Ministru Defeza no Seguransa no Ministru Interiór interinu Filomeno da Paixão de Jesus dehan, aniversáriu PNTL ba dala 20 ne'e, la selebra ho formalmente tanba situasaun kalamidade ne'ebé sai ameasa boot ba ema-nia vida iha mundu inklui Timor-Leste.
"Ita-boot sira haree serimónia ne'e simples liu, embora ha'u la konkorda ho agrupamentu ema barak demais, la'ós hanesan ne'e mak ita simu, importante mak instrusoens," dehan Ministru Filomeno iha Komandu Jerál PNTL Kaikoli bainhira partisipa iha aniversáriu PNTL, Sesta (27/03/2020)
Nia dehan, iha situasaun estadu emerjénsia ne'e PNTL sorizu boot tanba PNTL iha oin no F-FDTL iha kotuk.
"PNTL agora sorizu boot, tanba emerjénsia ne'e PNTL iha oin Falintil Forsa Defeza Timor Leste iha kotuk. Entaun husu mak ne'e, sentidu hierarkia tenke forte, komandante ida de'it, laiha komandante rua no tuun ba kraik hala'o serbisu maka'as tuir dutrina, orden ka disiplina ne'ebé ita iha," dehan Paixão
Iha fatin hanesan, Komandante Jerál PNTL Komisariu Faustino da Costa mós fó parabens ba intituisaun PNTL ne'ebé eziste ona durante tinan 20.
"Parabens ba PNTL ne'ebé ohin halo tian 20 no mós ba lideransa PNTL nian husi hahú to'o ohin loron, parabens mós ba sira, tanba esforsu ne'ebé mak sira iha, ohin loron PNTL eziste tinan 20, maske iha nafatin difikuldade no difikuldade lubuk ida, maibé ho tinan 20 ne'e, ita tenta oinsa par atu serví ita-nia povu no sosiedade ho di'ak liu tan," dehan Faustino.
Komjer mós fó parabens ba membru PNTL sira ne'ebé sa'e tan diviza iha aniversáriu PNTL nian ba dala 20 ne'e.