"Solusaun saída deit mak Prezidente Repúblika deside, ami hotu partidu PLP konkorda no apoiu," dehan Prezidennti interinu PLP, Abrão Freitas "Mate Restu", iha Prezidensiál, Bairru-Pité, Sesta (24/1).

Entertantu PLP iha VIII Governu Konstitusionál halo koligasaun iha AMP, maibé bloku ne'e ameasadu fahe malu hafoin Bankada CNRT iha Parlamentu Nasionál fo votu abstensaun ba OJE tinan fiskál 2020 ne'ebé aprezenta husi Governu.

Antes ne'e, Prezidente Repúblika, Francisco Guterres Lú Olo hateten, ronda diálogu ne’e hala’o atu rona solusaun konkretu atu hakotu impase ne’e husi dirijente partidu polítiku no xefe bankada.

Prezidente Repúblika, Francisco Guterres Lú Olo, ohin, hahú rona solusaun polítika ba situasaun polítika-konstitusionál atuál husi dirijente partidu polítiku no xefe bankada Congreso Nacionál de Reconstrução de Timor-Leste (CNRT), Klibur Haburas Unidade Timor Oan (KHUNTO) no koligasaun Frente Mudansa/ União Democrática Timorense (UDT).

Prezidente Repúblika informa ba dirijente partidu polítiku no xefe bankada sira katak, hafoin OJE 2020 la pasa, presiza Timoroan hotu nia unidade atu hakotu situasaun polítika ne’e atu labele hada'et liután ba beibeik.