Diretóra Apoiu Organizasaun Naun-Governamental Munisípiu Baukau, Maria Evelina de Fatima Guterres, esplika, implementasaun MPOHA tinan 2022 iha Baukau hamutuk 2, ne'ebé nian implementa ba Aldeia 2, mak hanesan Aldeia Samalari, Suku Samalari, no Aldeia Buibau Suku Buibau pertense ba Postu Administrativu Baukau Vila.

"Programa PMOHA iha Baukau hanesan pilotu ita implementa iha Suku 2, iha Suku Buibau Aldeia Buibau, Suku Samalari Aldeia Samalari", dehan nia iha kna'ar fatin vila nova, segunda (20/02).

Enkuantu alokasaun orsamentu ba programa refere ba implementa iha Aldeia 2, husi OJE 2022 hamutuk rihun US$40, ne'ebé kada Aldeia ida hetan osan rihun US$20, ba konstrusaun Sede Aldeia ho medida 6X12, kompostu husi sala servisu rua, haris fatin ida, no sala refretóriu ida, ne'ebé kompleta ho fasilidade asesibilidade ba ema ho difesiensia.

PMOHA refere nia data implementasaun iha Baukau tinan 2022 nia klaran dadaun sede aldeia Buibau atinji ona persentu 80, enkuantu sede aldeia Samalari fizikamentu foin atinji pursentu 25, tanba kondisaun dalan difikulta transporte tula sasan ba fatin konstrusaun.

"Nia implementasaun husi ita nia komunidade sira, sente iha benefísiu ba sira, ita hakarak programa ne'e labele hapara, maibé kontinua para hafoun hotu ita nia Aldeia sira iha teritóriu laran, liu-liu iha Munisípiu Baukau", nia akresenta

Lista PMOHA 2023 ne'ebé www.tempotimor.com asesu nia orsamentu hamutuk US$365,000 ba Munisípiu 14, enkuantu ba Munisípiu Baukau, nia alokasaun rihun US$60 ba Aldeia 3.

"2023 nian sei iha kontinuasaun depende ba orsamentu ne'ebé mak prevé ona, tuir planu ba Aldeia 3, maibé ide ne'e sei uza sistema random sistema sira ne'e mak sei lacak rasik", nia informa (*)