"Konstituisaun dehan Prezidente Republika dekreta data eleisaun tenki la’o tuir lei, tanba iha ne'ebá lei eleitorál hatete Presidente Repúblika dekreta eleisaun so iha proposta Kalendáriu eleitorál do governu, entaun depende mos ba governu, tanba sira mak sei realiza eleisaun, sira hatene kondisoens hotu-hotu preparadu no bainhira mak atu realiza", dehan nia iha Parlamentu Nasional, Segunda (16/01).
Defini Eleisaun Parlamentár kompeténsia Prezidente Republika (PR) nian, maibé tenki hein mós proposta governu nian bazeia ba lei, tanba labele ultrapassa tempu normal lejislatura nian hanesan tanba konstituisaun haruka, ne’ebé ho durasaun tinan 5, no kada tinan 5 iha sesaun lejislativa tinan ida.
"Se no kazu konstituisaun hatete, iha disolusaun Parlamentu, deputadu eleitu foun ne’e hahú nia durasaun kompleta de'it sesaun lejislativa enkursu, purezemplu iha tinan 2018 disolusaun Parlamentu ida mosu hafoin eleisaun antisipada ne’e nia kompleta de'it sesaun lejislativa ne'ebé momentu 2018 la'o hela, ne'ebé sesaun lejislativa normál ne'e hotu iha 14 setembru 2023, tanba ne'e 15 setembru foin sura foun kintu lejislatura", nia esklarese.
Antes ne'e, Prezidente Republika (PR), José Ramos Horta hatete, antes atu dekreta data eleisaun sei konsulta ho lider polítika sira, liu-liu líder partidu polítiku sira nia opiniaun.
“Ha'u seidauk marka, ha'u sei konsulta lai ho lider sira hotu, ho governu, para depois marka data ida ne’ebé desidi hotu-hotu simu, tanba ha’u lakohi ha’u mak desidi, impoin”, dehan Horta. (*)