"Agora ita iha hela faze negosiasaun ida atu kria akordu bilateral ida ba mobilidade Governu ho Governu (G to G) oinsa haruka timoroan sira ba servisu iha ne'ebá ho formál, liuhusi SEFOPE ka husi governu ne'ebé mak G to G," dehan Ministra Magno iha Parlamentu Nasionál, tersa (11/10).

Tanba, dadaun timoroan barak moris terus iha portugal, nune'e audensia entre MNEK ho Komisaun B Parlamentu Nasional mos kestiona kona-ba asuntu ne'e.

Ministeriu Negosiu Estranjeiru no Kooperasaun mos esforsu ona  hodi halo apelu ba timoroan sira atu labele ba portugal lai, no bainhira  situasaun aseguradu ona mak sira bele ba.

"Maibé timoroan sira prefere rona ema seluk, sira ba nafatin, que sira-nia situasaun agora triste tebtebes iha ne'ebá," nkia hatete

Tanba ne'e, Governu agora tenta buka hela solusaun, no hetan mos apoiu husi Ministru Koordenador Asuntu Ekonómika (MKAE), Joaquim Amaral, hodi ko'alia hela ho liña ministérial balun atu buka solusaun nomos sei koordena ho organizasaun internasional IOM, atu oinsa bele buka solusaun lalais ba timoroan sira iha Portugal.

Solusaun seluk ne'ebé MNEK deskute hela ho governu portugés mak, oinsa husu apoiu ba governu portuges atu rezolve timoroan ne'ebe agora iha ona portugál, ne'ebe la hetan tratamentu di'ak husi kompaña, liliu la halo pagamentu ba traballador sira-nia salariu.

Maibé, kona-bá prosesu negosiasaun ho governu portuges mos ne'e la'os fasil, ne'e sei lori tempu, tanba tenke haree akomoda mos preokupasaun governu portugéz sira-nian kona-ba kondisaun traballadór portugéz sira ne'ebe servisu iha Timor-Leste.

"Ami sei haree negosiasaun ne'e mak la'o di'ak, entaun iha tempu badak nia laran ita bele iha akordu, bele haruka formalmente ba G to G inves ke ita haruka tuir ajensia ke halo timoroan sira mos moris terus  iha ne'ebá," nia afirma. (*)