Diretór Jerál SEFOPE, Paulo Alves hatete, ba tinan 2022, Governu aprova orsamentu fundu transferénsia públiku nian ho montante US$700.000 liuhusi SEFOPE hodi apoiu ba kada sentru formasaun sira iha teritóriu nasionál hodi kapasita jove sira.

“Faz parte ida prepara joven Timoroan sira wainhira ita adere ba ASEAN karik ita-nia skil ida hanesan ne'e iha ona, sé la'e ita tama ASEAN halo uma monta arus de'it mós ema husi liur mak mai, entaun joven iha ne'e hamrik hatete, ami ne'e hanesan bainaka, komflitu krime bele mosu, entaun ida-ne'e ita lakohi”, dehan nia iha salaun enkontru SEFOPE Baukau hafoin asina akordu ho PAM Baukau, kinta (28/07).

Nune'e, iha loron 28 fulan-jullu tinan-2022, parte SEFOPE asina ona akordu ba tinan-5 nian ho Prezidente Autoridade Munisípiu Baukau atu estabelese plataforma diálogu iha Baukau envolve husi liña Ministeriál hotu iha nível Munisípal atu halo koordenasaun no apoiu formasaun ho empregu nian ba joven sira iha nivél Suku.

Tanba maioria joven iha Timor-Leste remata eskola sekundária iha kapasidade atu dezenvolve iha área seluk, maibé laiha koñesementu atu dezenvolvimentu, tanba hela iha área remota nune'e la asesu informasaun kona-ba formasaun nian atu dezenvolve.

“Formasaun iha área agrikultura, konstrusaun sivíl, automotif no sira seluk tán, no joven sira ne'ebé hela iha Suku hakarak tuir formasaun ne'e, plataforma ne'e ajuda sira bele rekomenda ba SEFOPE bele hetan formasaun, ho gratuita”,dehan nia.

Prizidente Autoridade Munisípal Baukau, Olivio Freitas hatete, akordu ne’ebé asina ho parte SEFOPE atu loke formasaun tékniku nian iha Munisípiu Baukau to'o iha nível Suku hodi prepara joven hodi partisipa iha dezenvolvimentu iha nível Munisípal no nasionál.

“Formasaun ne'e sempre iha harapan fó ba nasaun mak ita halo”, afirma nia.

Tanba ne’e, husu ba joven sira atu prepara-an hodi partisipa formasaun husi SEFOPE ne'ebé tempu besik sei lansa iha Munisípiu Baukau.

Partisipante Leoneto da Silva Ximenes, orgullu ho polítika Governu Konstituisionál daualu ne'ebé lansa husi SEFOPE atu fasilita formasaun gratuitu ba joven sira iha kada Munisípiu, tanba bele kapasita joven sira prepara ba futuru.

“Planu ne'e mak prepara joven ba adere ASEAN nian, husu atu tékniku sira la'o to'o Suku halo sosializasaun ruma para joven hatene hodi partisipa, sé la'e ita dehan de'it mais atu realiza susar”, afirma nia. (*)