“Ha’u rona fali esplikasaun husi señor Ministru kona-ba edifísiu Parlamentu ninian ne'e mak hanesan halo ha'u fuan moras oituan. Governu hó fali opsaun katak iha fatin tolu mak Governu hili, ha'u hanoin ida ne'e laloos”, dehan Xefe Bankada KHUNTO, Olinda Guterres iha plenária Parlamentu Nasionál, tersa (14/06).

Tanba kestaun fatin atu hari’i edifísiu foun ne’e tuir loloos Governu labele fó fali opsaun ba Parlamentu Nasionál atu hili, maibé Governu tenke deside fatin ida de’it atu fó PN tuir rezolusaun ne'ebé iha.

Tanba ezemplu, se Governu hanoin tau iha Hera entaun deside Hera de'it ona, ida ne'e mak loos, no labele fó fali opsaun ba PN mak deside.

“Governu labele fó fali Opsaun tolu ba Parlamentu Nasional hakarak hili ida ne'ebé. Ita-boot sira hili tiha, ami iha ne'e hili tiha fatin, ita-boot sira mai dehan tenke ida-ne'e, ha’u hanoin ida-ne'e ladún loos”, afirma nia.

Iha ne'e Bankada KHUNTO mós haree katak tuir loloos kestaun fatin ne'e Prezidente PN mak iha diretu tomak atu foti desizaun hodi hili fatin ne’ebé propiu.

Prezidente PN, Aniceto Longuinhos Guterres Lopes hatete, nia parte husu ona Governu atu oferese rai iha Kaikoli hodi estabelese edifísiu PN.

“Di'ak obrigada, ha’u husu tiha ona tau iha Kaikoli, mais agora PN mak tenke buka fali rai iha Timor ne’e mak problema, loloos PN kuandu hakarak ida-ne'e, laiha ema ida iha raí ne'e, dehan ida ne'e labele”, afirma nia.

Tanba ne'e, kestaun tékniku kona-ba rai mak la di'ak karik bele ba seluk de'it, enkuantu ida-ne'e prosesu la’o hela, no depois mak haree. (*)