“Filipina sempre suporta tanba iha relasaun di’ak tebes ho Timor-Leste ne’ebé sempre suporta nasaun ne’e tama ka adere lalais ba ASEAN”, dehan Abdul Maid hafoin audénsia ho Prezidente Repúblika, José Ramos Horta iha Palásiu Prezidensiál Bairopite, tersa (07/06).

Ba audénsia ne'ebé Embaisador Filipina iha Timor-Leste hala'o ho Prezidente Repúblika ko’alia mós kona-ba adezaun Timor-Leste ba iha ASEAN, tanba Prezidente Repúblika atual sempre iha interese atu Timor bele adere ba ASEAN.

Iha audénsia ne’e, Embaisadór Filipina ho Prezidenre Repúblika Horta diskute asuntu edukasaun liliu kona-ba estudante bolseiru sira ne’ebé daudaun ne’e sei kontinua estudu iha Filipina.

Nune’e mós diskute asuntu kooperasaun sira hanesan iha setór Agrikultura no Ekonomia atu oinsá bele hametin liután hodi bele fó benefísiu ba rai rua ne'e iha futuru.

Tanba durante ne’e estadu Filipina ho Timor-Leste iha relasaun di’ak, nune’e Filipina mós sempre suporta vistu ba estudante Timoroan liu 300-resin ne’ebé ba estuda iha Filipina, no sira balun ramata ona filafali mai kontinua sira-nia servisu iha ne’e.

Ba kooperasaun ne’ebé durante ne’e la’o, la’ós iha aspetu edukasaun de’it maibé iha mós aspetu sosiál ekonomi mós Filipina sempre apoiu nafatin Timor-Leste.

Iha Kooperasaun ida ne'e Xefe Estadu Jose Ramos Horta sente agradese no promete iha tempu badak sei hala’o vizita Filipina tanba konsidera embaisadór ne'ebé mak representa Estadu no povu Filipino la’ós de’it amigu baibain maibé nu’udar família ida ba nia no povu Timor Lorosa’e.

Enkuantu, embaisadór Filipina sei termina nia mandatu iha fulan-juñu ne’e no tuir planu sei fila hikas ba nia rain iha loron 22 fulan-juñu hodi ba asume fali responsabilidade seluk. (*)