Portavoz Sentru Integradu Jestaun Krize (SIJK) Odete Viegas informa, iha kazu pozitivu Covid-19 na'in 22, inklui mós inan oan nurak ida.
"Husi pozitivu sira ne'e iha Tasi-tolu señora ida mak ho nia oan, nia pozitivu i nia oan negativu no nia oan ne'e ita muda tiha ona ba iha Hotel Farol hamutuk ho nia tiun ida mak akompaña hela nia, tanba nia negativu ita labele tau hamutuk ho nia inan, nia inan ita muda tiha ona i nafatin iha Vera Kruz mak hamutuk 22 pesoas ne'e," informa Odete iha Sala Situasaun Sentru Konvensaun Dili, Kuarta (22/04).
Entretantu, kona-ba kazu konfirmadu Covid-19 ba loron Kuarta, Odete dehan, sei mantein kazu pozitivu 23. Husi númeru ne'e na'in ida rekopera no na'in 22 iha izolamentu.
"Dadus konfirmadu mantein hanesan horseik 23 no 22 pozitivu i ida rekopera," dehan Odete.
Ema sira ne'ebé konfirmadu pozitivu, nia dehan, kompostu husi Timor-oan na'in 21 no ema estranjeiru na'in 2.