"Risku husi Covid-19 nian, ne'e risku liu ba ema ne'ebé iha idade 60 ba leten, maibé ema ne'ebé husi tinan 60 mai kraik nia risku ladun maka'as. maibé nia afetadu ba ema hotu hanesan de'it," dehan Portavoz SIJK Doutór Rui Maria de Araujo iha sala situasaun CCD Dili, Tersa (07/04/20202)
Eis Primeiru Ministru iha VI Governu ne'e afirma, ema ne'ebé ho idade 60 ba leten mak sofre hela moras seluk mak Covid-19 kona ne’e perigu liután.
"Sira ne'ebé iha tinan 60 ba leten mak iha tan moras seluk ninia risku atu hetan gravidade ne'e boot liután, purtantu ida ne'e mak evidensia internasionál hatudu ba moras ida ne'e," nia dehan
Portavoz SIJK ne'e akresenta, bainhira ema ruma mak hetan ona moras ne'e 20% mak grave maka'as.
"Bainhira iha komunidade ruma mak afetadu ho moras ida ne'e, formalmente pursentu 80% lijeiru no moderadu, maibé pursentu 20% mak grave, tanba ne'e presiza atendimentu iha Ospitál," dehan Rui