Tempotimor (Díli) –  Atuál Sekretáriu Jerál Partidu FRETILIN, Mari Alkatiri hatete atu lidera povu tomak sai di'ak, lideransa sira tenke iha konsiensia ne'ebé di'ak duni, hodi lidera ba oin.

"Bainhira iha kampaíña eleitorál, partidu polítiku sira promete ona atu servi povu. Tanba ne'e, labele haluha buat ne'ebé promote ba povu sira," Alkatiri Afirma nu'udar oradór iha Seminariu ida ne'ebé Fakuldade Direitu Universidade Nasionál Timor Lorosa’e (UNTL) hala'o, Kuarta (04/09/19) iha UNTL.

Iha seminariu ne'ebé ligasaun ho loron 4 Setembru, eis Primeiru Ministru ne'e rekoñese katak loron ne'e nu'udar loron importante ba Povu Timor-Leste, ne'ebé hetan ninia diretu ba liberdade.

"Liuhosi autodeterminasaun ida ne'e, bele loke dalan ba komunidade sira atu hetan rekoñesementu maioria hodi bele partisipa iha prosesu tomak," atuál Sekretáriu Jerál  Partidu FRETILIN ne'e esplika.

Iha fatin hanesan, estudante husi Fakuldade Direitu UNTL, Angelino dos Reis Jeronimo sente kontente no agradese tebes, tanba bele hafanu estudante sira kona-ba istória Timor-Leste nian iha tinan ruanulu ba kotuk.

"Istoria ida ne'e hafanun nafatin ami nia matenek, no loke tan pasu ba ami estudante sira, atu haka'as an hodi estuda no ba futuru hodi servi povu no rai ida ne'e," espresa Angelino.

Angelino mós husu ba nia maluk estudante no joven sira, atu labele para lee istória Timor-Leste nian, tanba istória ne'e hanesan identidade Timor-nian.

Tempotimor (Dili) – Governu Timor-Leste ne'ebé lidera husi Primeiru Ministru Taur Matan Ruak, preve orsamentu milioens US$ 47.5 ba Ministériu Saúde, hodi responde ba programa 2020 nian.

"Orsamentu Ministériu Saúde nian ba 2020 ne'e hamutuk milioens US$ 47.5. Ne'e aloka ba saláriu no vensimentu, Bens no servisus inklui tranferensia públiku," hatete Ministru Saúde  Interinu, Bonifasio Maicoli dos Reis iha Hotel Timor, Kuarta (04/09/19).

Nia mós dehan, orsamentu ba MS liuliu iha kapitál menor laiha. Tan ne'e, ninia parte agora halo hela proposta adisionál," tenik Bonifasio.

Orsamentu tinan 2020 nian, tuir MS interinu ne'e, sei aloka boot liu ba iha parte saúde  primaria ninian, tanba programa ida ne'e besik liu ba komunidade.

Tempotimor (Díli) – Primeiru Ministru VIII Governu Konstitusionál, Taur Matan Ruak lori povu Timor-Leste nia naran, hato'o agradese ba Ian Martin ne'ebé fó ona ninia kontribuisaun ba Timor-Leste nia destinu, liuhosi referendu iha 30 Agusto 1999.

"Hanesan Primeiru Ministru, lori povu no nasaun Timor-Leste nia naran hakarak agradese ba ita boot 'Ian Martin' liuhosi apoiu, kontribuisaun no kapasidade lideransa jestaun durante tinan ruanulu nia laran ba kotuk, ne'ebé iha situasaun difisil liu, iha ami nia nasaun," PM Taur Matan Ruak espresa nia agradesimentu ba Ian Martin iha Hotel Timor, bainhira komemora loron 4 Setembru ba dala ruanulu, Kuarta (04/09/19).

Lider Nasionál ne'e mós dehan, maski situasaun iha tempu ne'ebá defisil tebes, maibé Timor-Leste konsege hetan nia vitoria ba libertasaun. “Parabens ba ita boot, Ian Martin,” hatete PM Taur.

Tempotimor  (Díli) – Ministériu Edukasaun, Juventude no Desportu (MEJD), Dulce de Jesus promete, iha 2020 MEJD sei fó kompleta fasilidade hanesan meza ho kadeira ba Ensinu Báziku (EB) iha munisípiu hotu-hotu.

"Governu iha planu hodi kontinua harii no kontinua kompleta livru, infraestrutura inklui meza ho kadeira. Ho problema hirak ne'e, Ministériu Edukasaun sei aumenta mós  orsamentu, atu nune'e bele responde situasaun iha Ensinu Báziku iha munisípiu hotu-hotu," informa MEJD iha Hotel Timor, Kuarta (04/09/19).

Ministra ne'e katak sei halo rekrutamentu mós ba profesores. Tanba, eskola barak mak sei menus profesores.

"Ministériu Edukasaun, identifika ona atu halo rekrutamentu profesores sira ne'ebé iha kualidade di'ak, hodi bele hanorin iha eskola sira," nia informa.

Tempotimor (Díli) – Hahú husi loron 26 to'o 31 Agostu 2019, Unidade Emerjensia Hospitál Nasionál Guido Valadares (HNGV), rejista pasiente hamutuk 673.

Xefe Unidade Emerjensia HNGV, Lucia Celeste Amaral ba tempotimor.com, Tersa (03/09/19) hatete, númeru pasiente aumenta relasiona ho feriadu loron Konsulta Populár 30 Agusto.

"Pasiente ne'ebé tama iha emergensia durante 24 oras, mak hanesan kazu maternidade, asidente no mós kazu sira seluk," Lucia informa iha ninia knaar fatin, HNGV, Bidau, Díli.

Lucia dehan, iha periode ne'e, fatin iha sala emerjensia nakonu ho pasiente sira ne'ebé transfere husi klínika.

"Hospitál ne'e, hasoru impaktu bainhira halo registrasaun ba pasiente sira ne'ebé laiha karta transferensia, husi klínika ne'ebé sira halo tratamentu ba," Lucia haktuir.