Tempotimor (Díli) – Prokuradór Jerál Repúblika (PJR), José Ximenes informa, oras ne'e daudauk relatóriu Komisaun Inkeritu Parlamentar (KIP), ne'ebé haruka ba Ministru Públiku (MP) iha hela faze investigasaun judisiál.
"Relatóriu ne'e, ha'u simu ona. Haruka mai gabinete prokuradór no agora ne'e ferias hela. Entaun, ami despaxu ba gabinete kombate korrupsaun para hahú investigasaun," informa PJR, José Ximenes, iha Tersa (03/09/1 9).
Nia hatutan, bainhira investigasaun remata, la para iha Ministériu Públiku. Maibé, sei la'o tuir dalan ne'ebé iha.
Bankada FRETILIN iha Parlamentu Nasionál, haruka relatóriu KIP ne'e ba Ministériu Públiku hodi halo investigasaun judisiál iha loron 28 Agusto 2019).
Apoiu FRETILIN
Entretantu, Partidu Demokrátika (PD) konkorda bainhira Partidu FRETILIN, ne'ebé lori relatoriu Komisaun Inkeritu Parlamentar (KIP) ba Ministériu Públiku (MP), hodi halo investigasaun ba projeitu 143.
"Ami hanesan membru Komisaun Inkeritu Parlamentar ne'e sente iha buat balun ne'ebé mak presiza klarifika husi autór judisiariu sira, se FRETILIN hatama ona, ita agradese tanba FRETILIN hakarak hatene lia loos," komenta deputadu Bankada Demokrátika, Adriano Nascimento, Segunda (02/09/19) iha Parlementu Nasionál.
Tuir Adriano katak, husi projetu 143 ne'e kuaze 90 resin mak hanesan projetu emerjensia, maski projetu sira ne'e nia karater la'ós emerjensia nian.