Prezidente Autoridade Munisípiu (PAM) Buakau, Olivio Freitas hatete, anula vaga Finansas Públika inklui enjiñeiru arsitektus ho nia númeru referénsia 03/SMARU/AM-BCU/XII/2021 no 04/SMARU/AM-BCU/XII/2021.
"Konkursu la'o kleur tiha ona, simplesmente iha problema ida deskonfia konflitu de interese, iha alin feto ida ke nia maun rasik mak nu’undar prezidente juri, lei fó ema hotu-hotu tuir, so ke señor ida ha'u nomeia nian nu’undar prezidente juri ne'e la tuir lei, lolos nia rezigna-aan kuandu nia alin ne'e tuir, akta mós nia la asina," dehan PAM Baukau iha Administrasaun Munisípal, sesta (11/02).
Bainhira Prezidente Autoridade Munisípal loke vaga, aprovadu husi Komisaun Funsaun Públiku, tanba ne’e, lei fó kompetensi ba Autoridade Munisípal atu halo anulasaun.
Nune’e, sei halo fali reanunsiu públikasaun foun ba ema hotu bele kompete liuhusi prosesu normal hodi asegura integridade Munisípal.
"Ita la'os bolu familiarista, buat bolu konflitu de interese, ‘tidak mungkin’ ha'u nia alin, ha'u mak Prezidente Juri, ha'u dehan nia lakon labele, provas mai katak, nia manan iha fatin rua, fatin ida nia manan primeiru lugar, fatin ida nia manan ho segundu lugar, ne'e ba ha'u, ha'u labele fiar ona situasaun ida hanesan ne'e, ha'u nu’undar Autoridade tenke haree buat ne'e, ha'u deskonfia, ha'u nia deskomfia bele real," nia akresenta
Vaga dadaun halo anulasaun ne'e, inklui oan husi Prezidente Autoridade Munisípal mós tuir, maibé lakohi husik situasaun hirak ne'e, akontese, tanba hakarak harii Administrasaun ida ne'ebé kredivél, nune'e bele halo servisu ne'ebé loos.
Enkuatu vaga rua ne'e, ba ema na'in-18, maibé tuir rekizitus prioridade ba ema minimu lisensiatura husi tekníku sipil inklui arkitektu. (*)