Hafoin prosesu iha loron kinta (02/09), TDD iha alegasaun finál Ministériu Públiku (MP) husu ba tribunál atu aplika medida koasaun aprezentasaun periodika ba timoroan na'in-haat (4).
Enkuantu, estranjeiru ida husi Atapupu Indonézia ne'e, MP husu prizaun preventiva ho razaun nia dokumentu la kompletu hanesan pasaporte.
Ho nune'e, parte Defensór Públiku, aseita desizaun husi MP nian, aumezmu tempu husu ba TDD atu haree sirkunstánsia hodi foti medida, no adia prosesu julmentu ne'e iha sesta (03/09), iha tuku 11:00 oras dadeer.
Kontinuasaun ba prosesu primeiru interogatóriu, iha sesta (03/09) ne'e, TDD hasai desizaun hodi aplika Termu Identidade Rezidénsia (TIR) ba sidadaun hamutuk na'in 5 ne'e atu halo aprezentasaun aan ho periodikamente iha kada semana.
"Ba kazu ne'ebé akontese iha dia 31 de Agostu, horisehik julgamentu, e ohin rona ninia kontinuasaun ba desizaun iha prosesu ne'e, ministériu públiku akuza ba kliente kona-ba kontra bandu ne'ebé previstu iha kódigu penál, 116. Iha ne'e, ninia prosesu ne'e la'o, e investigasaun ne'e la'o, to'o mai iha primeiru interogatóriu ida ne'e, ministériu públiku husu medida ne'ebé adekuadu ba arguidu sira mak aprezentasaun perodika", dehan, Marito da Silva, Defeza husi arguidu sira, iha TDD, sesta (03/09).
Advogadu husi Fundasaun Lia-loos ne'e hatuta, iha aprezentasaun periodika ida ne'e, MP husu ba arguidu husi timoroan na'in-4 atu aprezenta kada semana ida dala-ida, no arguidu husi estranjeiru ne'e, MP husu atu aprezenta-an semana ida dala-rua, iha loron segunda ho sesta.
"Sidadaun Indonézia ne'e, ministériu públiku husu preventiva, maibé haree ba sirkunstánsia, tribunál foti medida seluk, mak medida aprezentasaun periodika ba semana ida dala-rua. Segunda ho sesta, ne'e ba sidadaun Indonézia ne'e. Mais ba sidadaun timor na'in-4 ne'e, semana ida dala-ida", esplika nia.
Kona-ba evidénsia sira ne'ebé molok ne'e polísia prende, tribunál halo ona apura sei iha prosesu nia laran, hodi entrega na'in husi sasán sira (karreta ho motorizada).
Maibé, prosesu ida ne'ebé agora dadauk iha, aplika de'it medida de'it ba arguidu sira atu halo prevensaun.
"Mais prosesu ne'e seidauk. Prosesu ne'e sei kontinua", dehan nia.
Aleinde ne'e, objetu ne'ebé sai prinsipál ba kazu ne'e mak, indika ba tabaku-lulun (pohong sahu) ho kuantidade hamutuk kaixa 40.
Enkuantu, arguidu husi sidadaun estranjeiru ne'e, seidauk bele halo deportasaun, tanba sei iha prosesu investigasaun laran, inklui laiha identifikasaun ida ne'ebé loloos ba nia.
"Seidauk bele deporta tanba laiha identifikasaun ida ne'ebé loos ba nia hodi nune'e, nia só indika hela ninia família ida iha ne'e, ne'ebé sementara ne'e nia iha Kuarentena, depois kuarentena hotu, nia sei ba hela iha família ne'e para hodi akompaña nafatin prosesu investigasaun", hatete nia. (*)