Durante kapturasaun, Prezidente ANC ne’e ladun koalia no hili dalan nonok bainhira SIK halo buska no rekoilla dokumentu inklui informasaun relasiona ho kazu internet ilegal.

Tuir observasaun www.tempotimor.com iha terrenu durante prosesu tomak hahu husi oras 10 : 00 otl too remata 13 : 04 otl, Prezidenti ANC barak liu nonok bainhira SIK husu tuir dokumentu no prosesu lisensa inklui lalaok servisu ANC nian.

Prezidente ANC ne'ebé hahu nia mandatu iha tinan 2018 hodi substitui Prezidenti anterio, Antonio Correia, antes ne'e mos hanesan fungsionariu kontratadu iha ANC.

"Hau so bele ko’alia buat ne'ebé iha ha’u nia mandatu," Prezidente ANC koalia oitoan bainhira akompanha SIK durante iha edifisiu ANC-MTK Kaikoli Dili, Kinta (26/11).

SIK rasik durante investigasaun iha edifisiu ANC asegura dokumentu sira hanesan lisensa kompañia operador hamutuk 12, Konta bankaria ANC, Komputador ida no Loter internet inklui Segel metin odamatan Prezidenti ANC nian.

Durante SIK nia prezensa iha edifisiu ANC, alende detein Prezidente ANC, iha mos fungsionariu tekniku balun no diretora finansas ne'ebé akompaña oferese dokumentu no informasaun ba SIK.

Husi observasaun www.tempotimor.com mos nota, maioria fungsionariu ANC nian senti hakfodak ho buska ne'ebé halo husi SIK durante oras rua nia laran.(*)

Publisidade