Tempotimor (Dili) – Tan transporte limitadu, difikulta Sekretáriu Estadu Protesaun Sivíl (SEPS) hodi bele fó apoiu emerjensia ba komunidade 700 resin, ne'ebé sai vitima ba inséndiu ne'ebé akontese kuaze iha territóriu tomak, inklui RAEOA.

SEPS hatete, tempu udan besik ona, apoiu emerjensia SEPS halo daudauk ona. Maski, iha fatin balun seidauk bele fó apoiu tanbá dadus no tanbá problema transporte atu tula sasán.

"Karreta aluga ne'e limitadu. Tula tiha sasán balun ba fatin akontesementu, karreta tenke filafali mai Dili, para tula fali sasán ba fatin seluk. Maibé, kona-ba emerjensia nian ita prepara. So ita preokupa kuandu tinan 2020, stock bele laiha. Ida ne'e ita atu fó apoiu emerjensia mak difisil uitoan," nia esplika.

Alende ne'e, tuir SEPS iha loron 25 Outubru liubá, katuas ida iha Same mate tanbá nia sunu nia to'os, iha tempu anin bo'ot huu no atraves ba katuas ne'e mos mate. Iha foho Matebian iha uma lisan 14 mak ahi han inklui uma komunidade nain 5.

SEPS halo ona koordenasaun ho PNTL atu bele halo investigasaun kle'an hodi hatene motivu husi sunu rai ne'e rasik.

Prevensaun seluk, tuir SEPD mak halo ona enkontru ho pontu vokál sira iha ministériu no munisípiu  hotu, para bele koordena ho administradór, xefe suku no xefe aldeia sira, hodi alerta ba povu kona-ba inséndiu ne'ebé akontese iha sira nia área.

Tempotimor (Dili) – Universidade Nacional Timor Lorosa'e (UNTL) liuhusi Fakuldade Siénsia Sosiais, Departementu Komunikasaun Sosiál (FSS-DKS), haruka estudante na'in neen hodi apoiu Rádiu Komunidade (RAKOM) neen, iha munísipiu ne'ebé identifika ona.

"Programa ne'e servisu hamutuk UNTL no SECOMS. Ne'ebé hetan apoiu husi povu Japaun no UNICEF. Estudante sira apoiu rádiu komunidade iha munísipiu durante loron 22. Sira sei ba hala'o peskiza hamutuk ho Rádiu Komunidade kona-ba promove rejistu moris ninian," dehan Diretór Departementu Komunikasaun Sosiál, Marcelino Ximenes Magno, iha serimónia deslokasaun estudante iha FSS-UNTL, Sesta (25/10/19).

Eis jornalista Revista TEMPO, Jakarta ne'e hatete, Rádiu Komunidade ne'ebé estudante FSS-DKS sira ba apoiu mak: Rádiu Komunidade Covalima, Rádiu Komunidade Kafe, Ermera, Rádiu Komunidade Lian Matebian, Baucau (RCLMB), Rádiu Komunidade 1912, Manufahi, Radiu Komunidade Manatuto no Rádiu Komunidade Viqueque.

Iha lansamentu ne'e, Dekanu Fakuldade Siénsia Sosiál, Camilo Ximenes Almeida kongratula ba estudante na'in neen, ne'ebé hala'o estájiu ka apoiu Rádiu Komunidade iha munísipiu.

"Estájiu hanesan faze ida ne'ebé atu kompleta teória. Tanba, iha teória maibé laiha prátika, sei la iha folin. Tanba ne'e, labele moe atu husu. Xave ba susesu mak husu bainhira ita seidauk kompriende didi'ak," dehan Camilo.

Estudante na'in ne'e ne'ebé hala'o estájiu ka apoiu rádiu komunidade mak hanesan: Isac Rangel, Franzela Pinto, Estónia Maria Madalena, Laurinda Verísima, Fidelia Ximenes de Araújo, Marcelo da Silva.

Tempotimor (Dili) – Sekretáriu Estadu Protesaun Sivíl (SEPS), Alexandrino de Araujo ezije ba Ministériu Obras Públika (MOP), atu bele kria kondisaun ba estrada no be'e, hodi fasilita Bombeirus rezolve problema sunu rai, ne'ebé daudaun akontese iha fatin barak.

"Presiza koperasaun ho liña ministeriais sira seluk. Liuliu Ministériu Obras Públika (MOP). Tanba, Bombeirus ita rekruta no iha ekipamentu. Maibé, kuandu ahi han no dalan la asesu ou dalan aat. Ne'e problema," dehan SEPS iha Parlamentu Nasionál, Sesta (25/10/19).

La'ós problema asesu ba estrada de'it, SEPS mós lamenta ho situasaun balun ne'ebé akontese hodi obriga Bombeirus labele halo nia servisu ho di'ak.

"Tuir fali kona-ba bee. Hanesan foin lalais akontese iha Asumanu, Munisípiu Liquica, semana liubá. Bainhira Bombeirus ba rega, depois bee iha tanki hotu. Nia tenke karega fali bee. Mas, tenke ba buka bee iha fatin seluk. Ida ne'e katak, presiza iha preparasaun bee," nia haktuir.

SEPS reafirma katak nia mós halo ona planu iha orsamentu ba tinan 2020, hodi halo rekrutamentu tan Bombeirus no hola ekipamentu Bombeirus nian.

Tempotimor (Dili) – Iha posibilidade, Partidu Congreso Nacional Reconstrução Timorense (CNRT), lori Prezidente Repúblika (PR), Francisco Guterres Lú Olo ba tribunál. Tanba, viola membru Governu indijitadu na'in sia (9), nia direitu umanus.

"Desizaun Prezidente Repúblika nian ne'e foti tuir kompeténsia. Mas, kompeténsia ida ne'ebé bele kontrária ho konstituisaun, tanba direitu umanus. Ne'e, ema nia direitu. Ha'u tau ita boot iha ne'ebá, dehan ha'u la gosta o, ha'u hasai tiha o, nusa!" dehan Prezidente Bankada CNRT, Duarte Nunes ba tempotimor.com iha Parlamentu Nasionál (PN), Sesta (25/10/19).

Nia esplika, nu'udar nasaun ida, Timor-Leste mós iha tribunál. “Kuandu ema ne'e ita la satisfeitu, tanba direitu internasionál mós proteje ita, ne'ebé bele (ba tribunál)," dehan Duarte.

Duarte afirma, bainhira atu lori ba tribunál, presiza rona mós husi membru Governu indijitadu sira ne'ebé Prezidente Repúblika la fó pose. Nia dehan, tanba ema sira ne'e mak iha direitu.

Tempotimor (Dili) – Sekretáriu Estadu Juventude no Desportu (SEJD), Nelio Isaac Sarmento informa, iha orsamentu hamutuk millaun $4.5 atu fó apoiu ba komunidade ka grupu joven sira, hodi dezenvolve ekonomia iha sira-nia suku.

Nia subliña, Sekretáriu Estadu Igualdade Inkluzaun (SEII) iha millaun $1.5, Sekretáriu Estadu Arte no Kultura (SEAK) iha Millaun $1.5 no SEJD iha millaun $1.5. “Entaun, orsamentu hamutuk millaun $4.5 atu implementa programa ba komunidade iha tinan 2020,” nia esplika.

Apoiu ba suku hirak ne'e, nia dehan, la'ós hanesan subsídiu ida hodi moris beibeik. Maibé, ne'e hanesan subsídiu la permanente ka temporaria.

"Orsamentu hirak ne'ebé apoiu ba grupu sira iha suku ne'e, uza hanesan kapitál ba dezenvolvimentu. Maibé, tenke fó fila. Se la fó fila mak sei simu responsabiliza i la hetan tan oportunidade hodi asesu ba oportunidade tuir mai, ne'ebé  Governu fó," esplika SEJD iha Palásiu Governu, Sesta (25/10/19).

Nia informa, koloka orsamentu atu apoiu ba grupu joven liuliu ba feto sira ne'e, subsídiu temporaria para sira bele uza hodi dezenvolve ekonomia iha sira-nia suku rasik.

Tempotimor (Dili) – Sekretáriu Estadu Juventude no Desportu (SEJD), Nelio Isaac Sarmento hatete, konfrontus entre joven iha Kapitál Dili, ikus-ikus ne'e tan de'it ódiu malu no egoista atu rezolve problema. To'o ikus lakon futuru.

Nia dehan, kuandu problema individu ne'ebé akontese bei-beik iha suku ka bairru laran, ne'e responsabilidade pesoál hodi ba hatán nu'udar kriminál.

"Servisu Komisaun Reguladór Arte Marsiais (KRAM), oras ne'e la'o hela iha munisípiu atu sosializa lei no fó hanoin ba joven sira atu hadook-an husi violensia i ko'alia mós kona-ba kondisoes sira ne'ebé  agora Governu kria, para joven sira bele asesu," informa SEJD, iha Palásiu Governu, Sesta (25/10/19).

Iha sorin seluk, nu'udar Prezidente KRAM, Nelio husu ba joven sira atu hakmatek. Ho ida ne'e, nia dehan, Governu bele kria kondisaun di'ak para joven sira bele aproveita oportunidade.

“Se lakohi hadomi futuru, envolve an iha violensia. Ida ne'e, responsabiliza pesoál ba ninia aktu,” nia hatete.

Nelio afirma, kestaun hotu-hotu akontese tanba sedauk simu malu ho di'ak, hanesan timoroan. Joven sira sei rai ódiu ba malu, hodi kria konflitu.

“Ikus mai, halo inan ho aman sira terus no estadu mós preokupa. Tanba, estadu nia responsabilidade atu haree ba seguransa iha área hotu-hotu atu di'ak,” nia esplika.

Tempotimor (Dili) – Estudante besik 100 husi Universidade Orientál Timor Lorosa’e (UNITAL), Sesta (25/10/19) hala'o long march husi Marconi (Kampung Alor) to'o iha resintu UNITAL, Becora, Dili.

Vise Prezidente Komisaun Organizadora, Marcelino Baltazar hatete, atividade ne'e hodi komemora loron moris UNITAL nian ba tinan 17.  

“Objetivu husi eventu ne'e mak atu komemora Dies Natalis UNITAL ba tinan 17. Partisipante iha eventu ne'e mak estrutura univesidade hamutuk ho estudante sira,” informa Baltazar iha Palásiu Governu nia oin, Sesta ohin.

Nia rekoñese, partisipasaun estudante iha eventu ne'e ladún máximu. Nia dehan, estudante barak mak okupadu ho sira-nia atividade.

"Razaun sira ladún partisipa, tanba dalaruma estudante balun okupadu ho sira-nia atividade. Balun foin mak fila husi estájiu," informa Baltazar.

Hatán kona-ba tansá hahú husi Marconi, Kampung Alor? Senadu Fakuldade Edukasaun UNITAL, Atanásio da Silva esplika, tanba tinan 17 liubá, UNITAL hahú husi Marconi, Kampung Alor. 

“UNITAL harii foufoun iha Marconi. Agora, UNITAL nia kampus foun mak iha Becora,” dehan Atanásio.  

Tempotimor (Dili) – Sosiedade sivíl iha Timor-Leste husu ba membru Governu daualu ne'ebé seidauk hetan pose, bele hakat tuir Xanana Gusmão nian ain fatin, ne'ebé deklara rejigna-an.

"Ba membru Governu na'in sia (9), ne'ebé la hetan posse husi Prezidente Repúblika (PR) Francisco Guterres Lú Olo, di'ak liu hola pozisaun ruma ka rejigna-an, hanesan ezemplu ne'ebé Xanana Gusmão hatudu tiha ona. Kuandu nia la simu pose, nia rejigna-an. Agora, Xanana bele halo, tanba saida mak sira seluk labele," dehan Diretór Ezekutivu Fongtil, Daniel Santos do Carmo iha CCD, Kinta (24/10/19).

Iha fatin hanesan, membru Asia Justice and Rigths (AJAR) Inocencio Xavier katak, CNRT tenke haree tuir KHUNTO ne'ebé troka ona nia membru Governu.

"CNRT tenke haree ba partidu KHUNTO ne'ebé troka ona lista ne'e. Tanba, lista pendente husi CNRT mak barak. Entaun, husu ba señor Xanana Gusmão, katak tenke iha paixaun atu substitui ona membru sira ne'e. Labele tan de'it ema na'in 9, sakrifika ema miliaun. Ida ne'e, labele," dehan Inocencio.

Tempotimor (Dili)-Sosiedade Sivíl la konkorda bainhira Eleisaun Antesipa (EA) mosu fila fali tanba sei halo mukit liu tan povu Timor Leste.

Tempotimor (Dili) – Prezidente Grupu Mulher Parlamentu Timor-Leste (GMPTL), Lidia Norberta katak, jerasaun foun hahú lakon nia valór morál ba igreja Katolika iha Timor Leste, maske iha tempu okupasaun, papél igreja importante tebes.

"Igreja Katólika iha papél importante. Maibé, ohin loron mós igreja Katólika, ita ko'alia buat ida liberdade, to'o ikus ita halakon tiha ita-nia valór no rikusoin, ita-nia patrimóniu ida ne'ebé durante ne'e kuandu luta ba libertasaun, igreja hamutuk ho ita. Ida nee ita tau sees tiha. Ita lahatene katak eroi sira di'ak ohin loron ne'e, igreja mak produz," hatete Prezidente GMPTL, Lidia Norberta bainhira partisipa Kongresu Feto Timor-Leste ba dala lima, iha Sentru Konvensaun Dili, Kinta (24/10/19).

Nia afirma, igreja kontinua harii nia papél, para inan-aman no parte kompetente tau atensaun no forma jerasaun foun sira.

"Igreja Katólika kontinua hola nia pozisaun. Inan-aman, edukasaun no sosiedade bele tau matan ba jerasaun foun sira. Bainhira sira hotu hola pozisaun, mak to'o ikus sei hetan sidadaun ne'ebé di'ak ba rai ida ne'e," nia afirma.

Reprezentante feto iha Parlamentu Nasional (PN) ne'e mós dehan, atu hetan sosiedade di'ak ba nasaun Timor-Leste, tenke iha edukasaun husi parte entidades hotu-hotu, hodi la'o iha dalan ne'ebé loos.