Diretór Ezekutivu Forum ONG Timor Leste (FONGTIL), Daniel Santos do Carmo hatete, eleisaun antisipada la’os solusaun di’ak hodi rezolve problema politika ne’ebé akontese iha Timor Leste.
Tanba, nia dehan, bainhira EA mosu fila fali sei lori TL ba situasaun ne’ebé frazil liu tan.
"Ita ko'alia kona-ba eleisaun atisipada buat ne'ebé ladun apoiu iha ita-nia prosesu dezenvolvimentu no bele lori ita-nia nasaun ne'e sai frazil liu tán iha mundu," dehan Daniel iha Sentru Konvensaun Dili, Kinta (24/10/2019).
Tuir nia, di’ak liu politiku-nain sira tuur hamutuk hodi buka dalan oinsa atu solusiona problema ne’ebé povu enfrenta duke gasta enerjia no tempu ba EA.
"Di'ak liu ita tuur hamutuk hodi buka solusaun ba problema ne'ebé mak povu enfrenta iha rai laran. Tanba ita hatene katak eleisaun antisipada ne'e la'os halo de'it maibé gasta rekursu barak," dehan Daniel.
Iha fatin hanesan membru Asia Justice and Rights (AJAR) Inocencio Xavier afirma, EA sei gasta de’it osan estadu nian.
"Ita ba eleisaun antisipada gasta de'it osan, kresimentu ekonomiku rai ne'e ninian kontinua mukit, ida ne'e sei la rezolve ita-nia problema," dehan Inocencio.
