Tempotimor (Dili) – Sekretáriu Estadu Formasaun Profisionál no Empregu (SEFOPE) iha fulan ida ne'e nia laran, sei haruka tan traballadóres Timoroan 400 resin ba Austrália.
"Ohin (Tersa 10/09), ajensia ka emprezariu rua husi Austrália mai hasoru ha'u hodi deskute. Sira hakarak fó oportunidade ba ita nia joven sira. Liuliu ba kandidatu sira ne'ebé mak ita rekruta ona iha munisípiu foin dadauk ne'e,” hatete SEFOPE, Julião da Silva ba tempotimor.com iha ninia knaar fatin, Tersa (10/09/19).
SEFOPE dehan, kandidatu traballadór balun husi munisípiu komesa bolu ona. Tanba, ajénsia rasik atu hahú ona halo teste, hodi haruka traballadór sira ba servisu ona iha Austrália.
Tuir SEFOPE, kompañia rua nia ema ne'ebé mai enkontru ho SEFOPE hatete, sira presiza traballadóres 400 resin.
"Empregadór Hell Brout ho Sunny Ridge mai foti ita nia traballadór hamutuk 400 hanesan ne'e. Ba empregadór Hell Brout kuaze atus tolu resin no ba Sunny Ridge hamutuk 24, sira hakarak foti iha fulan ida ne'e nia laran," SEFOPE informa.
Iha fatin hanesan, empregadór Sunny Ridge mós promete katak, bainhira traballadór sira hatudu preparasaun di'ak, sira sei simu traballadór barak liután.
"Kompañia espera katak ema na'in 24 ne'e kuandu hatudu performas ne'ebé di'ak, iha periodu tuir mai fali sira sei mai foti fila traballador 50 ka 60 hanesan nee,” SEFOPE haktuir.
Entretantu, SEFOPE mós promete katak tempu besik sei asina tan akordu ho klínika privadu inklui Hospitál Nasionál Guido Valadares (HNGV) hodi halo teste fíziku ba traballadór sira.