Xefe aldeia Uligata, Jilberto Ximenes informa, komunidade suku afaça kontinua preukupa ba bee moos, tanba bee matan Boe-ira ne'ebé durante komunidade sira uza ho nia debitu ki'ik tebes fahe ba aldeia 3 labele aguenta.

"Iha tempu bailoron hahú husi fulan juñu to'o fulan dezembru ami susar ba bee-moos, tanba iha bee matan ida de'it, maibé nia volume ki'ik tebes", dehan nia ba www.tempotimor.com iha suku Afaça, domingu (14/11).

Bee matan ne'ebé dadaun iha susar atu kobre ba sira nia nesesidade kada loron, maibé hanesan autóridade halo jestaun atu kada uma ka’in hetan bee 25 litru iha loron ida.

"Maibé ema ne'ebé iha karreta motor sira ba kuru fali iha aldeia samaguia kougira suku tekinomata, iha laga nian ne'eba", katak nia

Nune'e, komunidade husi aldeia Uligata, Catarina Ximenes haktuir, dala barak akontese problema iha kuru bee fatin, tanba de'it komunidade balun hakarak kuru to'o jereken-10.

"Ami mós dala ruma hahú kuru bee mai hein tuku 3 madrugada to'o tuku 8 dadersan mak foin enxe masa-5", nia afirma.

Nia haktuir, bee-moos ne'ebé loron ida kada uma ka’in hetan jereken-5 lasufisiente, tanba labarik sira dadersan uza hariis ba eskola enkuantu restu uza ba tein nian la to'o.

Nia sente triste ho preukupasaun ne'e, tanba hahú husi tempu okupasaun indonesia infrenta ba bee moos to'o ohin loron.

Entertatu suku Afaça aldeia 3 hanesan aldeia Uligata, Boralai, Uekubuti, no nia populasaun totál hamutuk na'in-1778. (*)