SEKoop Sei Fasilita Formasaun Kooperativa ba Membru MOKATIL-Aileu

Sekretáriu Estadu Kooperativa (SEKoop), Elizário Ferreira ho membru MOKATIL sira hala’o hela observasaun ba mákina produsaun kafé batar no sorgum iha sentru kooperativa lokaliza iha Suku Liurai, Postu Administrativu Aileu Munisípiu Aileu, sábadu (14/08). Sekretáriu Estadu Kooperativa (SEKoop), Elizário Ferreira ho membru MOKATIL sira hala’o hela observasaun ba mákina produsaun kafé batar no sorgum iha sentru kooperativa lokaliza iha Suku Liurai, Postu Administrativu Aileu Munisípiu Aileu, sábadu (14/08). Foto Tempo Timor

 

Tempotimor (Aileu)-Governu liuhusi Sekretária Estadu Kooperativa (SEKoop) planu sei fasilita formasaun jestaun no akontabilidade ba membru kooperativa sira iha Movimentu Kamponezes Timor-Leste (MOKATIL) iha suku Liurai, Postu Administrativu Aileu, Munisípiu Aileu hodi eleva koñesimentu ba hametin sustabilidade institusionál iha futuru.

“Ita prontu atu fasilita formasaun, iha ajenda hela, ami temi bebeik mais foin mak nakloke ba. Ita foin nakloke atu sirkula, maibé Ermera tama ona ba konfinamentu, siknifika labele sai. Ita iha Aileu bele. Tanba ne'e, tempu besik iha formasaun iha formasaun ba ita-boot sira, e ba oin kooperativa ne'ebé ita-boot sira hari’i, bele asesu ba selseluk tan hodi asegura serbisu tomak ne'ebé mak iha ne'e. Atu nune'e, ita bele kria kondisaun ne'ebé mak di'ak hodi fó vida ba ita-nia membru sira”, dehan Sekretáriu Estadu Kooperativa (SEKoop), Elizário Ferreira, iha vizita ba membru MOKATIL sira iha Suku Liurai, Munisípiu Aileu, sábadu (14/08).

Tanba hakarak membru sira mak benefisiádu hodi tulun kooperativa, labele instituisaun mak bokur, maibé membru sira ki’ak ba nafatin. Ho ida ne’e bele hamosu pergunta.

 “Ohin (14/08), ha'u mai vizita ita-boot sira, atu hatene ita-boot sira-nia kondisaun. Kondisaun mak hanesan ita dehan, sé ita-boot sira benefisiadu, siknifika ita kria kondisaun atu asegura nia sustentabilidade”, dehan nia.

Iha vida kooperativa, atu fó moris ba membru sira, la'ós moris ba ema ida rua iha kooperativa nia laran, tanba ne'e mak presiza ema luta ida ema hotu nian, no labele luta ida ne'ebé grupu ida mak benefisiadu, maibé temi kamponezes sira ki’ak ba nafatin.

Nune’e, tenke muda konseitu ida ne'e, katak kamponezes ne'e tenke muda nia vida, kamponezes mak tenke sai ema riku, kamponezes tenke na'in ba kampu, labele temi kamponezes, maibé grupu ida mak na'in ba kampu, n'e la'ós kamponezes, maibé  bandidu-nezes.

Maibé membru sira tenke halo serbisu ida ne'ebé kontribui ba malu atu asegura sustentabilidade kooperativa nian, asegura bein-estar membru nian, asegura ekonómia ne'ebé di'ak ba membru sira.

“Ba oin ita ajenda hodi halo formasaun, hodi nune'e bele fó vida ba ita-nia populasaun, ba kamponezes sira, ba kooperativa sira, no ba ema hothotu ninia di'ak ne'e. Ha'u la ko’alia barak, mais atu hatete de'it katak, ami ajenda formasaun ba ita-boot sira”, haktenik nia.

Husi vizita ne’ebé halo, la’ós atu halo diskursu, maibé atu rona progresu no difikuldade saida mak membru sira hasoru iha baze. Tanba iha mandatu, la hanesan ho misaun uluk nian, tanba hakarak membru mak tenke riku hodi fó benefísiu ba instituisaun.

“Primeiru ha'u atu husu pergunta fali, karik bele hatan kedan ha'u. Primeiru, produsaun sira ohin imi oferese ba sesta bázika ne'e, kooperativa nian ka anggota (membru) nian. Depois osan ne'e hela iha anggota ka, ou anggota ne'e, hetan pursentu. Toos ne'ebé anggota sira halo ne'e, halo komunal iha fatin ida ka, idaidak halo iha nia to'os mak oferese ba MOKATIL. Ema sira ne'ebé serbisu iha sentru ida ne'e, hetan benefísiu husi saida. Mákina sira ne'e, sé mak tau mina, no sé mak halo manutensaun. Sustentábilidade husi sentru ida ne'e ninian ne'e, asegura liuhusi saida. Entaun, ida ne'e pergunta ida ne'ebé mak sai hanesan pergunta ida ne'ebé mak ita-boot sira bele hatan”, husu Elizário.

Prezidente Kooperativa MOKATIL Aileu, Januario de Araújo Ximenes hatete, atividade produsaun ne'ebé durante halo iha sentru MOKATIL ne'e, fó duni benefísiu direta ba membru sira.

“Membru sira ne'ebé serbisu iha sede MOKATIL Aileu, hodi halo empakotamentu ba produtu sira, kada loron ema ida hetan US$5, to'o fulan ida sira hetan US$150. Sira-nia serbisu iha sede kooperativa ida ne'e mak hanesan dulas batar, balu packing ba  kilograma 1, balu dulas, balu halo operasaun ba mesin, balu kuda iha área rurál, depois mak ita-nia transporte ba tula mai iha sentru ne'e”, esplika nia.

Kooperativa MOKATIL Munisípiu Aileu, hari’i iha tinan 2016 to'o oras ne'e iha ona membru hamutuk ema rihun-ida-haat (1.004). (*)

Rate this item
(0 votes)
Last modified on Monday, 16 August 2021 00:34
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« October 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter