“Grupu sira ne'ebé halibur-an iha fatin ida ne'e, grupu sira ne'ebé mesak badinas, tanba ami durante ne'e, ami laiha tan dalan oinsá mak atu legaliza ami-nia kooperativa. Entaun, ho objetivu dadeer ida ne'e ami tenta aprezenta rezultadu produsaun ba ami-nia grupu de produtores sira, depois ami prepara hodi hein exelénsia Sekretáriu Estadu Kooperativa (Elizario Ferreira), ne'ebé oras ida sei mai halo abertura ba grupu produtores sira, depois sira (SEKoop) sei enkamiña ami, oinsá mak atu la'o tuir matadalan kooperativa nian", hatete Koordenadór KPM, Cipriano Esteves iha Edifísiu Ministériu Agrikultura no Peskas (MAP), Munisípiu Ainaru, kinta (08/07).

Maibé ho esperansa katak, prezensa husi SEKoop nian, bele hafanun liután toos na'in sira, la'ós ba dala-uluk, maibé liuliu kona-ba merkadória.

Kooperativa produsaun multisektorial ne'e, la'ós de’it eziste iha Munisípiu Ainaru, maibé nia sanak mós ba to'o ona Aileu, Covalima (Suai), Lospalos, Baukau iha parte rua, nomós iha Oekusi ba Postu Administrativu Passabe nian.

"Ami seidauk iha membru ne'ebé serteza, maibé ami-nia grupu ne'e eziste purvolta de 152 grupus ne'ebé benefisiáriu indireta bele dehan katak ema bele to'o rihun-6. Sé direta, ita halo vezes de'it kada grupu ida ema uma-kain 20, tun liu mak uma-kain 8”, dehan nia.

Produtu ne’ebé sira produz mak, Strawberry ne'ebé eziste tinan barak ona tama iha merkadu, koto, iha ortikultura mak ai-manas, modo, ho variedade items kuaze rihun-ida-resin.

“Ami seidauk hetan legalidade, ne'e mak ami prepara agora ne'e atu hetan legalidade husi Sekretáriu estadu kooperativas. Durante ne'e hanesan de'it sentidu kontente de'it, ne'ebé prontu, tanba grupu sira ne'e iha limitasaun ba merkadu, entaun ha'u rasik mak sai hanesan mós koletor ida, hanesan mós koletor sira seluk, garante merkadu ba ita-nia komunidade sira ne'ebé badinas tebes iha toos laran, hodi nune'e labele hamate sira-nia sentidu de vontade ba produsaun. Ida ne'e kna'ar ha'u-nian hanesan mós ema sidadaun foinsa'e ida, ne'ebé iha papel mós oinsá lori grupu sira ne'e ba iha kontribuisaun ba ita-nia ekonómia rai laran", afirma nia.

Produtu hirak ne'e, sira lori ona ba fa’an iha supermerkadu sira iha kapital Dili hanesan, Lita Store, Leader, May Mart, Dili Mart, ne'ebé hatama liuhusi Movimentu Kooperativa Produsaun (MKP).

Kona-ba rendimentu ne'ebé hetan, husu ba membru sira atu labele foti hotu, barak liu bele foti pursentu 60 (60%), no pursentu 40 (40%), bele rai hela hanesan fundu ida hodi nafatin halo expasaun ba atividade iha toos laran.

Entrentantu Membru grupu KPM, Aderito Soares da Costa Moniz hatete, atividade ne'ebé durante halo iha grupu mak hanesan, kuda hudi, modo, nomós hakiak bibi iha luhan, no konsege fa’an ona iha merkadu sira iha Munisípiu Ainaru, nomós Postu Administrativu Maubisse.

"Ami produz tuir de'it kbi'it ne'ebé ami iha. Ami hari'i de'it grupu, mais nia lala'ok ida atu la'o oinsá ne'e, ami seidauk hatene, so loloos ne'e ami simu tiha formasaun sira ne'e ba tan mak bele hatene lala'ok ne'e hanesan ne'e. Durante ne'e seidauk temi kooperativa, ami hala'o grupu duni, lahatene, kooperativa ne'e halo nusá. Ida ne'e so ami simu formasaun sira ne'e mak ami bele hatene”, afirma nia. (*)