Prezidente Kooperativa CCLN Munisípiu Likisá, Vicente da Cruz da Conceiçăo ‘Railoos’ esplika, kooperativa ne'e sira hari'i atu fó prioridade ba kombatente libertasaun nasionál sira ne'ebé dadaun ne'e simu hela saláriu mensál husi governu.

"Porque ami haree katak, dezde implementa subsídiu ne'e ba kombatente sira, fó nafatin ba sira atu hetan ida ne'e, pur mais que tempu ida ne'ebá hodi mai to'o ohin loron, sira nunka mais atu halo reinvestimentu ruma. Ne'ebé reflete ida ne'ebé transformasaun da vida sira-nian ne'e, nunka mais iha mudansa ruma. Entaun, iha ne'e mak CCLN Munisípiu Likisá, iha altura ida kuandu estabelese, ami iha hanoin kedas programa alternativu ida liliu kooperativa”, dehan "Railoos", ba www.tempotimor.com hafoin simu vizita husi SEKoop iha Salaun Eis edifísiu Postu Administrativu Likisá Villa, sábadu (26/06).

Ho ezisténsia husi kooperativa ne'e, atubele akumula kombatente hothotu envolve iha laran, nune'e mós parte estrututa kooperativa nian sei buka atu sosializa nafatin informasaun ba kombatente sira atubele sai membru kooperativa CCLN nian.

"Ida ne'e luta ida atubele rezolve kustu de vida kombatente nian ba abain-bainrua. Ita bele hatete katak, médiu prazu, longu prazu, sira bele hetan benefísiu ida ne'e”, hatete nia.

Membru CCLN sira seidauk iha planu atu hari'i  kooperativa kréditu, tanba esperiénsia hatudu iha Munisípiu Likisá durante ne'e grupu kréditu barak mak monu hadeer, to'o halo membru barak mak sente tauk.

"Tanba ne'e mak ami halai liuba agrikultura, e kriasaun, ida ne'e mak importante. Dala-ruma iha risku hanesan iha peste ruma, bele saida, mais ami fiar katak ida ne'e sei la akontese ba kooperativa ida ne'e tanba pelu-menus ami-nia tékniku balu tenke buka atu rezolve meius oinsá atubele haree ida ne'e”, afirma nia.

Maske Kooperativa CCLN ne'e seidauk legaliza husi governu, maibé membru sira halao tiha ona servisu iha terrenu dezde fulan rua ba kotuk ho atividade hamoos duut iha kintál ho ektáre hakutuk 58 atu halo karau luhan hodi hakiak.

"Ami iha terrenu 58 ektáre, mais pur-enkuantu agora dadaun pur-volta 12 to'o 13 ektáre ne'e ami halo limpeza hotu ona, maibé servisu iha terrenu la'o namanas, e tempu besik halo lutu, e ami sei prepara ba lansamentu iha fulan-dezembru ne'e, kerdijer que buat hotu kompletu e ami hatama ona produtu ba laran”, haktuir nia.

Tanba grupu kooperativa ne'e foin hari'i fulan-janeiru tinan 2021 ne'e, no sira hakarak avansa uluk ho unidade hakiak karau bokur  tuir kbi'it finanseiru ne'ebé membru iha, ho tarjeru katak hafoin fulan 6 tenke hasai lori ba merkadu.

"Agora dadaun ne'e programa ba ona iha ne'ebá, tanba ami sei prepara ninia luhan, e prepara hahán, duut sira ne'e ami tenke kuda, para depois to'o nia tarjetu fulan 3 ami prepara ona karau nia uma, depois hotu ita prepara karau ba tetu", haktenik nia.

Tuir dadus provizóriu, dadaun ne'e sira iha ona membru hamutuk ema na'in atus-ida-resin (100), maibé tuir lísta kombatente ne'ebé valida ona, iha ema 1714, no sira ne'ebé seidauk valida hamutuk 1120.

Kritériu atu sai membru, ida maka ema ne'e tenke kombatente ba libertasaun nia oan, nomós ninia jersaun sira, maibé sei la taka dalan ba públiku ho fazeadamente.

"Tanba membru sira ne'e mak tau kapitál para hodi hala'o servisu kooperativa nian. Ne'ebé kada membru ida US$100, ho osan administrasaun US$5. Fulan-fulan osan obrigatóriu iha US$5, mak ne'e de'it. Kapitál husi US$100 itál membru ne'e, ita kuaze, pur-volta US$12 mill itál ona, e agora dadaun ami prepara ba atividade sira iha terrenu, ne'ebé osan mós seidauk sifisiente, maibé iha alternativu para atu rezolve servisu ne'e imediatu”, dehan nia.

Iha fatin Sekretáriu Estadu Kooperativa (SEKoop), Elizário Ferreira, sente haksolok tanba veteranu sira hahú foti inisiativa atu sai madatalan ba hari'i kooperativa iha baze, no enkoraja veteranu sira iha Munisípiu Likisá atu bele servisu ho maka'as liután iha luta libertasaun ba ekonómia povu. (*)