Diretór Nasionál Jestaun Risku no Dezastre, Agostinho Cosme Belo hatete, programa governu nian liuhusi protesaun sivíl hamutuk ho parseiru sira, iha loron 26 fulan-maiu fó apoiu ba família 305 mak faze kontinuasaun.

“iha semana kotuk liu-ba ita distribui ona ba família 401 ne’ebé totál iha suku Kamea hamutuk 706. Ohin (26/05) ita kontinua apoiu umanitária hanesan ai-hán ba família vítima 305”, dehan Agostinho iha suku Kamea, kuarta (26/05)

Apoiu umanitária husi governu (food item) hanesan foos, supermi, Mina, sardina kalen Lata, kafe, no masinmidar.

Maibé, família ne’ebé afetadu uma estragu iha diretu atu hetan apoiu rekoperasun material konstrusaun, tanba dadus ne'e SEPS halo hela verifikasaun.

Ho apoiu umanitária ne'e fahe ba kada uma-kain laiha diferente, no faze tuir mai ba material konstrusaun mak sei diferente tanba apoiu ne'e bazeia ba uma ne’ebé estragu.

Iha fatin hanesan xefe suku Kamea, Mateus da Costa hatete, iha suku Kamea aldeia hamutuk 13 no iha aldeia 7 mak hetan ona apoiu emerjénsia no aldeia 6 mak foin simu.

Husi aldeia sira ne’e mak Ailelehun, Ailoklaran, Aidak Behare, Buburlau, Kaixave no Leluku mak simu no husi aldeia ne'e totál 217 mak afeta.

Dadus sira ne’ebé foti mak família afetadu no la foti jerál tanba ne’e submete husi kada aldeia. No totál populasaun husi suku Kamea hamutuk 16.325. (*)