Formasaun ne’e hodi hasa'e kuñesimentu membru sira atubele jere kapitál kooperativa di'ak no ha nia sustentábilidade.
Sekretáriu Estadu Kooperativa (SEKoop), Elizário Ferreira hatete, formasaun refere oferese liuba dirijente kooperativa sira husi munisípiu Vikeke atubele oinsá sai jestór ida di'ak.
"Grupu neen ne'e, hamutuk ema besik 120 mak partisipa kompostu husi grupu ida ema na'in-20. Entaun, formasaun ne'e la'o simultaneamente no ami orienta atu formasaun sira la'o nafatin, maibé mantein regra ne'ebé husi Saúde fó sai ona ba públiku", esplika Elizário hafoin selebra loron Internasional Feto iha Akait, segunda (08/03).
Matéria ne'ebé ko’alia iha formasaun ne'e liga oinsá mak atubele jere kooperativa ho di'ak, no oinsá atubele hamosu produtu inovativu hodi oferese ba merkadu sira.
"Sira ne'ebé partisipa iha formasaun ne'e, barak mak husi jestór sira kooperativa kreditu nian, tanba sira tenke prepara-an di'ak liután atubele jere kapitál kooperativa nian durante loron lima, no ba oin kooperativa produsaun sira sei partisipa hotu", dehan nia.
Iha formasaun ba semestre dahuluk ne'e, SEKoop rejísta ona grupu alvu hamutuk 150, no sei hahú uluk husi munisípiu Vikeke, maibé sei kobre mós munisípiu sira seluk.(*)