Tuir Prezidente Komisaun C, deputada Maria Angelica Rangel, ohin Komisaun Finansas Públika tenta deskuti ona kalendáriu diskusaun nomós halo panorama kona-ba, proposta OJE 2021 nian, mezmu plenária seidauk baixa proposta ne'e va komisaun C. Nia dehan, bainhira PN submete ona proposta ne'e ba komisaun C, maka komisaun sei halo adjustamentu ba data, maibé iha buat balun komisaun finaliza hotu ona.
"Ami tenta aprova kalendáriu preparasaun orsamentu tanba prezidente dehan komisaun C mak sei prepara, Maibé prepara balun ona, soké ami tenke adjusta data tanba prezidente PN simu ona ajenda OJE 2021 nian, mais seidauk baixa mai komisaun C," dehan prezidente Komisaun C ne'e iha PN, Kuarta (21/10).
Deputada ne'e mós afirma, kona-ba panorama OJE 2021 nian, komisaun C sei bolu oradór sira husi governu, sosiedade sivíl, inklui parseiru sira hotu, atu hanoin hamutuk ho komisaun, oinsa prepara panorama ba proposta orsamentál nian. Nia mós afirma, kona-ba panorama OJE nian, sei hala'o durante loron rua, maibé atu halo iha nasionál ka ba munisípiu sei iha konsensu lai.
"PN sei halo panorama kona-bá OJE 2021 nian durante loron rua, naturalmente ami halo iha munisípiu ka depende lokál ne'ebé ami hili," dehan nia.
Entretantu Orsamentu Jerál Estadu (OJE) tinan fiskál 2021 nian ne'ebé governu submete ona ba PN iha loron 15 fulan ne'e, hamutuk billaun $1.895, ne'ebé sei prevé ba Saláriu no Vensimentu, Bens no Servisu, Kapitál Menor, Kapitál Dezenvolvimentu no Transferénsia Públika.(*)