SEKoop Akumula Ideias, Reforsa Serbisu Kooperativa iha TL

Sekretáriu Estadu Kooperativa (SEKopp), Elizário Ferreira reuniaun hamutuk ho sociedade sivil sira ninia kna'ar fatin Sekretáriu Estadu Kooperativa (SEKopp), Elizário Ferreira reuniaun hamutuk ho sociedade sivil sira ninia kna'ar fatin Foto Tempo Timor

Tempotimor (Díli)-Sekretariu Estadu Kooperativa (SEKooP) kontinua esforsu hodi bele reforsa serbisu kooperativa iha Timor-Leste. Meius ida ne’ebé SEKooP foti mak akumula ideias husi organizasaun naun-governamental (ONG) nasionál no internasional ne’ebé eziste iha Timor-Leste.

Iha Tersa (11/08), SEKooP realiza enkontru ida ho ONG nasional no internasional hodi husu sira-nia ideias relasiona ho serbisu kooperativa iha TL.

Sekretariu Estadu Kooperativa, Elizário Ferreira hatete, objetivu husi sorumutuk ho ONG sira hodi mobiliza apoiu atu haree ba serbisu kooperativa iha baze.

"Enkontru ida ne'ebé mak hala'o entre SEKoop ho ONG lokal no internasional sira ne'ebé mak domisíliu iha ita-nia rai laran ho ideia ida katak atu mobiliza sira-nia apoiu no kooperasaun atu bele hala'o serbisu ba baze hodi tulun ita-nia komunidade sira atu hadi'a kondisaun ekonómika ita-nia rai laran nian, liu-liu kontribui ba produsaun internu brutu, ka hasa’e ita-nia produtu lokál sira, atu nune'e bele kontribui ba dezenvolvimentu ekonómiku no kresimentu nasionál nian," informa Sekretáriu Estadu Elizário ba jornalista sira iha edifisiu SEKooP, Akait.

Iha enkontru refere, Elizario hatete, nia parte mós aprezenta serbisu no planu SEKooP ne'ebé hakarak atinze durante nia mandatu.

Elizário esplika, SEKooP halo elaborasaun planu estratéjiku la sees dook husi liña jerál ne'ebé temi no haktuir iha kompeténsia ne'ebé define iha dekretu lei númeru 16/2004.

Nia hatutan, metas ne’ebé SEKooP hakarak atinze ne’ebé define iha polítika governu daualu nian mak atu harii no promove ekonómia inkluzivuno naun diskriminativu, hadiak kooperativa, mikro no pekenas emprézas atu sai fatór determinante ba dezenvolvimentu sósiu-ekonómiku, no haburas kooperativa kréditu atu sai intermediáriu ba asesu finanseira.

Nia hatutan, SEKooP sei hametin kooperativa, mikro no pekenas emprezas atu halao auto seguru ba nia an; habelar kooperativa, mikro no pekenas emprezas atu hametin espiritu aolidariedade no kooperasaun; no hamoos kooperativa, mikro no pekenas emprezas ne'ebé la hatudu karáter solidarízmu no kooperativízmu.

Tuir Elizario, metas ne’ebé SEKooP hakarak atinje iha 2023 mak kria kampu serbisu ba juventude sira, asegura seguransa alimentar ba sosiedade, no kontribui ba kresimentu nasional no haburas ekonómia lokál.

"Aumenta kooperantes mínimu 150 to’o 250 mill kooperantes, aumenta kapital sosial mínimu 15 mill no másimu 25 mill dollares amerikanu, rendimentu perkapita husi kooperantes U$1.250 kada fulan," dehan nia.

Nia hatutan, atu hametin sustentabilidade kooperativa nian hodi sai hanesan instituisaun no estabilidade finanseira kooperativa nian, SEKooP foti prioridade primeiru loos mak edukasaun, formasaun no informasaun, tanba edukasaun sai hanesan baze ne'ebé atu eduka kooperante sira, no dirijentes kooperativas sira atu bele hala'o kooperativa tuir duni prinsípiu kooperativa nian hodi kontribui ba dezenvolvimentu membru sira nian.

Iha fatin hanesan, membru ONG Konservasaun Internasional, Manuel Mendes apresia ho planu ne'ebé SEKooP iha hodi dezenvolve di’ak liu tan kooperativa iha TL.

Tuir nia, oras ne'e nasaun TL depende ba mina rai, tan ne’e governu presiza hanoin oinsá mak forma grupu sira ne'ebé atu bele dezenvolve rekursu importante iha rai laran.

"Ita mós tenke deside tarjetu ba grupu ne’ebé harii ona. Ba ha’u-nia hanoin, ida ne’e tempu ona atu bele proteze ita-nia rekursu sira," dehan nia.

Nia husu ba SEKoop, atu iha futuru forma grupu karik bele la'o hamutuk ho sira hodi serbisu hamutuk bele proteze biodiversidade, tanba sira prontu atu serbisu hamutuk ho SEKooP hodi bele dezenvolve di’ak liu tan seitor kooperativa iha TL, liu'liu ba área protezidas ne'ebé TL iha.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.