Tuir informasaun ne’ebé www.tempotimor.com, asesu iha pájina Ministériu Finansas, kinta (11/05) katak, Relatóriu Trimestral Fundu Petrolíferu 31 Marsu 2023 fó informasaun detallada kona-ba Fundu ninia dezenpeñu iha trimestre ida-ne’e publika husi Banco Central Timor-Leste (BCTL) rasik.

Fundu ninia kapitál aumenta millaun $418 husi billuan $17,4 iha trimestre anterior ba billaun $17,8 iha trimestre ida ne’e. Reseita petrolíferas hamutuk millaun $21,2, enkuantu Governu halo levantamentu millaun $300 hodi finansia Orsamentu Estadu.

Títulu no asoens rejista retornu pozitivu iha primeiru trimestre. Inflasaun global tu’un husi nível a’as iha tinan kotuk maibé nafatin iha nível ida a’as. Banku sentral sira kontinua hasa’e taxa-de-juru hodi redús presaun inflasionária.

Tanba gañu iha trimestre ida-ne’e no kuartu trimestre tinan kotuk taka fali perda/lakon iha valór ne’ebé akontese iha inísiu tinan 2022. Fundu ninia retornu anual desde inisíu hamutuk 4,2%. Retornu asoens kada tinan maka 9,4% desde ninia introdusaun iha 2010, enkuantu rendimentu fixu ninia retornu anual 2% desde 2005. Asoens oferese retornu esperadu bo’ot iha tempu naruk maibé retornu sira ne’e voláteis teb-tebes iha tempu badak.

Fundu Petroliferu ninia stratéjia investimentu hetan ajustamentu iha Jullu 2021 hodi tau ba konsiderasaun faze dekumulasaun Fundu. Introdús Karteira Likidez ho ativus risku ki’ik (kaixa no títulus Tezouru EUA ho maturidade badak) hodi finansia Governu ninia levantamentu iha tinan tolu tuir mai. Restu husi Fundu nia ativu investe iha Karteira Kresimentu, nebe’e ho durasaun tempu naruk no inklui alokasaun 35% ba asoens. Segmentasaun tulun Fundu diak teb-tebes iha 2022. Investimentu iha Karteira Likidez ho risku-ki’ik asegura estabalidade iha ativu ninia valór no finansia Governu ninia levantamentu hamutuk billaun $1,4, iha tempu ida ne’ebé títulu no asoens nia valór monu dala ida.

Halo rebalanseamentu ba Karteira Likidez husi Karteira Kresimentu kada tinan hodi tau ba konsiderasaun Governu ninia levantamentu. Rebalanseamentu halo iha primeiru trimestre tinan ida ne’e. Iha fim Marsu, billaun $3,2 investe iha Karteira Likidez no billau $13,9 investe iha Karteira Kresimentu. Alein investimentu iha instrumentu merkadu finanseiru, Fundu mós emite dívida privada ba Timor Gap, E.P. iha 2019. Kada tinan avaliadór independente halo avaliasaun ba dívida privada ida-ne’e. (*)