Iha aprezentasaun ne’e, OMM husi Postu Alas, Costantina da Costa Silva hatete, durante SEKOOP atribui serbisu no haruka ba servisu iha Munisípiu konsege hari’i ona koperativa neen (6) iha postu Alas.

“Dirante ne’e ami kria grupu neen (6) no iha iha membru sira balun ema na’in-20 no balun membru liu, kooperativa refere iha Kréditu Uniaun iha tolu no produsaun iha tolu, maibé grupu Multisetorál ami seidauk hala'o atividade ida”, dehan nia ba Sekretáriu Estadu Kooperativa iha Salaun Ótel Flomar, kinta (28/07).

Alende OMM husi Postu Administrativu Turiskai, Joel da Conceição Nunes hatete, durante hala’o servisu iha Turiskai konsege ona grupu tolu.

“Husi postu administrativu Turiskai ami hari’i ona grupu tolu, grupu ida kréditu Uniaun ida nia iha Kapitál konsege to'o $5.000.00 ema kompostu husi 26 no ida produsaun sira-nia osan foin mak $1.000.00”, afirma nia.

Nune’e mós OMM husi Same Vila, Crisanto dos Santos informa, durante ne’e konsege ona hari’i grupu tolu iha Suku Grotu no Betanu.

“Antes destaka ami mai iha fatin ne’e ami konsege halo karta ba suku sira, no suku rua mak hetan resposta mak hanesan Suku Grotu, ho Betanu, nune'e ami hala'o kedas sosializasaun Kooperativa iha ne’ebá , komunidade iha inisiativa hari’i grupu tolu, maibé grupu tolu ne’e la kompostu ho ema barak, iha grupu ida feto nian, no sira tau naran grupu feto faluk, ne’e iha ema na’in-hitu (7) ida fali grupu hakbi’it feto maluk, no iha ema na’in-sanulu (10) iha ida seluk iha ema sanulu (10), grupu tolu ne’e rai ona Empresta”, dehan nia.

Tanba OMM sira, durante ne’e hari’i grupu hirak ne’e molok nakfilak ba Kooperativa presiza hetan formasaun bázika kona-ba Kooperativa nian iha sira ida-idak nia fatin.

Alende dezafiu sira ne’ebé mak OMM hasoru iha terenu mak, seidauk la iha transporte, presiza mós apoiu nafatin formasaun ba OMM sira, no difikuldade seluk mak labele halo movimentu ka vizita grupu sira iha tempu udan tanba hakur mota.

Nune'e Dezafiu seluk mak dadaun ne’e OMM iha Manufahi iha duni edifísiu ida maibé kondisaun mak la sufisiente tanba la iha mea kadeira inklui kondisaun edifísiu refere mós aat ona.

Prezensa OMM ho autoridade lokál sira la'o di’ak  tebes bainhira hala'o servisu ne’ebé mak Sekretáriu Estadu Kooperativa destaka ona funsionáriu hirak ne’e.

Sekretáriu Estadu Kooperativa (SEKOOP), Elizário Ferreira, apresia ba progressu servisu ne’ebé mak hala’o ona nune’e nia husu kona-ba edifísiu ne’ebé mak seidauk iha nia husu atu halo proposta ida kona-ba apoiu osan hodi halo rekonstrusaun ba edifísiu ne’ebé aat ona.

“Kona-ba edifísiu imi halo proposta ida hasai ho nia foto sira iha ba kondisaun uma ne’ebé mak aat ona, atu tau hamutuk hodi lori ba ha’u-nia kantor nune’e ha’u despaixu ida hodi aloka orsamentu ida ba imi-nia edifísiu”, dehan Elizário Ferreira.

Iha ne’e mós husu ba OMM sira atu hakbesik-an ba Igreja sira hodi ko’alia ho amu no leigu Igreja nia atu nune’e sarani sira bele tama hotu ba Kooperativa sira ne’ebé mak besik iha Igreja sira.

Iha reuniaun ne'e SECOOP husu ba funsionáriu no OMM sira atu hala'o reuniaun kada fulan mínimu dala-ida no másimu dala-rua, hodi nune'e bele atualiza nafatin progresu servisu ba malu inklui aktualiza situasaun hirak ne'ebé maka Movimentu Kooperativa sira hasoru iha baze. (*)