Tuir informasaun ne’ebé www.tempotimor.com asesu iha pájina MTKI, sesta (24/06) katak, Ministru Koordenador Asuntu Ekonómiku (MKAE), Joaquim Amaral, prezide sorumutu daruak entre KIMBDT hodi fortifika koordenasaun no kooperasaun.
Enkontru Lina-Ministeriál ne’ebé prezide husi Ministru Kordenador Joaquim Amaral, hetan partisipasaun husi membru Governu hothotu ne’ebé mak envolve iha Unidade Téknika ba Dezenvolvementu Turizmu.
Iha intervensaun husi Ministru Turizmu Komérsiu no Indústria (MTKI), José Lucas do Carmo da Silva hatete, Timor-Leste nia paisajen no foho nia natureza oioin ne’ebé mak sai poténsia ba indústria turizmu. Tanba ne’e ba lina-ministeriál kontinua koordena malu di’ak liután hodi dezenvolve setór ne’e ho di’ak iha futuru.
“Ita hotu hatene katak Timor-Leste poténsia boot ba setór túrizmu ho nia veleza no natureza oioin, maibé presiza tebes ita hothotu nia papél husi liña ministeriál hothotu, desde setór ida-ne’e nu’udar setór transversál, nesesita tebes ita hotu nia esforsu koopera no kordena atu ita-nia setór túrizmu la’o ba oin”, dehan nia.
Maibé durante tinan-rua Timor-Leste no mundu afeita husi surtu COVID-19 no kalamidade ne’ebé fó impaktu tebes ba nasaun nia dezenvolvementu iha área túrizmu.
Nune’e, periódu ida-ne’e difísil maibé oportunidade mós ba Governu atu oinsá uza oportunidade hadi’a programa dezenvolvementu no revitaliza setór túrizmu.
“Ami fiar katak ho koordenasaun no kooperasaun husi ministériu hothotu, ita bele dezenvolve di’ak liután setór túrizmu ida inkluzivu, sustentavel no iha responsabilidade ne’ebé boot liuba oin”, hatete nia.
Tanba ne’e, prioridade boot MTKI nian mak atu aprova Planu Estratéjiku Nasionál Túirizmu ba periódu 2022-2030, no enkorpora mós pilar prioridade, prosperiedade, protesaun, parseiru no ema.
Ba setór estratéjia ne’ebé mak define iha planu estratéjiku dezenvolvementu mak hanesan fatin túrizmu, Boa-governasaun instituisaun, produz servisu no túrizmu, infraestruktura, transporte no komunikasaun, investimentu bankária, finansas, Marketing no seluktan.
Tuir dekretu-lei 24/2014, 3 setembru estabelese baze politíka túrizmu indika instrumentu planeamentu turístiku ne’ebé dejignadu atu dezenvolve mak hanesan polítika nasionál túrizmu, planu estratéjiku dezenvolvementu túrizmu, zona turístika.
Hafoin ne’e liuhusi rezolusaun Governu númeru 16/2017, 5 de ábril aprova polítika nasionál túrizmu liliu oinsá atu fortalese identidade nasionál liuhusi kontribui aumenta empregu no promove imajen Timor-Leste ba estranjeiru.
Kompozisaun Liña Ministeriál ne’ebé iha Unidade Técnica para o Desenvolvementu do Turismu (UTBDT) mak, Ministériu Koordenadór Assuntu Ekonomiku, Ministériu Turizmu, Komérsiu no Industria, Ministériu Planu Ordenamentu, Ministériu Transporte no Komunikasaun, Ministériu Interior, Ministériu Justisa, Ministériu Administrasaun Estatál, Ministériu Saúde, Ministériu Obras Públicas, Ministériu Agrikultura no Peska, Ministériu Negósiu Estranjeiru no Kooperasaun, Sekretáriu Estadu Ambiente, Sekretáriu Estadu Arte-Kultura, Sekretáriu Estadu Formasaun no Profisionál no Empregu, Sekretária Estadu Kooperativa no Ajénsia Promosaun Investimentu no Esportasaun Tradeinvest. (*)
