Tuir informasaun ne’ebé www.trmpotimor.com asesu iha pájina MOP, sábadu (18/06) katak, planu hari’i kooperativa ne’e atu garante kondisaun hodi fasilita funsionáriu sira iha tempu emerjénsia ruma.
“Objetivu ne'e simples, prepara mekanízmu sosiál ida ke bele garante kondisaun emerjénsia iha kualker tempu ba ita-boot sira, pulsa hotu iha kalan boot mós ita iha ema bele haruka, ne'ebé kooperativa ne'e sei fa'an sira ne'e, neseidade báziku sira ne'e, depois loke tan kantin oan ida iha ne'e, nia benefísiu ne'e nafatin mai kooperativa, ne'ebé idea ida loke kantin ne'e mós parte husi kooperativa hotu, fasilita servisu, nia benefísiu ne'e filafali ba kooperativa ne'ebé ita manán barak, ne'ebé forma kooperativa ne'e ideál ba ita”, dehan Ministru Obras Públikas, Abel Pires, bainhira enkontru ho dirijente sira iha salaun enkontru MOP, Kaikoli, Dili, sesta (17/06).
Tanba ministériu ne'ebé jere orsamentu boot mak MOP, orsamentu rasik millaun $53 ba ministériu maibé see sura ho Eletrisidade Timor-Leste (EDTL.EP), Bee Timor-Leste (BTL.EP), Institutu Jestaun Ekipamentu (IJE.IP) ne'e sa'e ba millaun $200.
Tanba ne'e seidauk konta orsamentu iha projetu sira ne'ebé mak iha fundu infraestrutura, millaun $100 to'o $200 tan, seidauk tan projetu impréstimu, Grant kuaze millaun $300 ona, ne'ebé metode tiha husi bil direitamente no indireitamente, entaun servisu ne'e todan, atu servisu ne'e la'o di'ak ema ne'ebé mak halo servisu ne'e tenke iha kondisaun di'ak.
Ba kultura Timor nian iha lia mate no lia moris ne'e barak, inklui defikuldade iha família laran dalarum mosu deripente entaun obriga funsionáriu sira dalaruma tenke foti ema nia osan no sasán ho funan ne'ebé boot, tanba ne'e kooperativa ne'e sei fasilita hodi asesu ba kréditu ka impréstimu, inklui asesu ba sasán kooperativa nian.
“Ita tenke kria mekanizmu ida para ita-nia funsionáriu hotu sente katak saida mak akontese agora mós ita iha ona fatin ida para ba foti osan, fós ka nesesidade báziku ruma, tanba kargu xefia sira ne'e ladún maibé funsionáriu ka ofisiál sira ne'e presiza tebes, tanba ne'e mak ha'u hakarak ita introdús mekanízmu ida-ne'e iha forma kooperativa nian”, esplika Ministru.
Husi kooperativa ne'e bele loke kantin no nesesidade báziku sira seluk, nesesidade ministériu nian no rai no impresta osan, nia benefísiu ne'e sei filafali. (*)
