Husi formasaun ne’e ba área Kooperativa nian atu membru sira hodi hetan benefisiu husi kooperativa sira ne'ebé mak sira envolve iha laran.
Diretór Jerál Promosaun no Dezenvolvimentu Kooperativa (DGPDK), Francisco Xavier hatete, objetivu husi nota entendimentu ne'e ho Sekretária Estadu Kooperativa (SEKOOP) oinsá mak atu servisu hamutuk ho hadi’a grupu Kooperativa sira atu apoiu formasaun ba Kooperativa sira hodi fó benefisiu ba membru Kooperativa sira.
“Atividade ne'ebé mak Sekretáriu Estadu Kooperativa halo ba grupu Kooperativa liliu ba formasaun Kooperativa oinsá mak bele atende sira-nia atividade ne'e ho di'ak no oinsá mak sira bele halo relatóriu ida di'ak liliu ba sira-nia finanseiru ninian sira iha atu nune'e bele fó benefisiu ba sira-nia membru sira”, dehan Diretór Jerál Francisco Xavier ba jornalista sira iha edifisiu Mary Mackillop Today, Bekora, kuarta (25/05).
Alende ne'e SEKOOP mós sei fasilita grupu sira ne'ebé mak lideransa husi MMT hodi nakfilak ba kooperativa atu kontinua apoiu formasaun no sensibilizasaun hodi hala'o atividade ho di'ak.
“Objetivu asina nota entendimentu Sekretáriu Estadu de Kooperativa ho Mary Mackillop Today ne'e oinsá mak ita servisu hamutuk liliu grupu Kooperativa sira ne'ebé mak durante sira hamutuk pina e sira transfere mai fali iha Sekretáriu Estadu Kooperativa atu nune'e Kooperativa sira ne'ebé mak eziste ona balun la'o ona e balun seidauk transforma ba Kooperativa e SEKOOP atu nune'e atividade sira ne'ebé sira halo iha sira-nia Kooperativa e Sekretáriu Estadu Kooperativa liuhusi nia diresaun tékniku apoiu formasaun sira fó sensibilizasaun ba sira e atu nune'e sira bele dezenvolve e atividade ne'e di'ak liután ba futuru”, haktuir nia.
Diretór Mary Mackillop Today (MMT), Alipio Barbosa hateten, tempu ruma mak projetu ne'e hotu karik Sekretária Estadu Kooperativa bele apoiu filafali grupu refere hodi ba oin.
“Agora ita iha nota entendimentu aban bairua atu remata projetu iha Railaku ba grupu feto sira entaun ita tenta para servisu ho Sekretáriu Estadu Kooperativa para bele asegura sustentabilidade ba aban bairua”, afirma nia.
Tanba SEKOOP mak reguladora ba Kooperativa atubele ajuda hodi intende kapasitasaun no abilidade hodi iha koñesimentu oinsá mak jere osan, operasaun administrasaun aumezmu tempu bele tulun sira-nia finanseiru.
“Foin lalais ita hetan ajuda dehan operasionál ba kooperativa mai husi SEKOOP ho osan tranferénsia públiku ho montante $250.00”, dehan nia.
Alende ne'e Sekretáriu Estadu Kooperativa mós apoiu matéria ida mak oinsá mak halo relatóriu tanba ida ne'e mak MMT agradese katak no hatudu sinál ne'ebé di'ak bainhira projetu ne'e remata apoiu grupu sira hotu ne'ebé iha Railaku entaun Governu bele tulun sira.
Objetivu asina nota entendimentu ne'e iha ona planu atu finaliza projetu refere MMT sei entrega ba Governu liliu Sekretária Estadu Kooperativa (SEKOOP) hodi kontinua ba grupu sira ne'e atu ba oin grupu refere labele mate.
MMT durante ne'e loke grupu iha Railaku mak hanesan grupu feto ne'ebé nakfila ona ba Kooperativa Kréditu Uniun, grupu ida seluk mak hakiak Baunila. (*)