“Husu parlamentu atu rejeita proposta ida ne'e, atu rezerva ba tinan 2023, hodi deskuti klean, atu iha informasaun ne'ebe klean, klaru, tanba sa mak atu halo investimentu ida ne'e”, dehan nia iha kna’ar fatin Katedral, kuarta (04/05).
Tanba proposta orsamentu retifikativu billaun ida ne'e, la'ós dehan la importante maibé presiza diskute klean, tanba iha 2022 Governu mós foti tokon $90 resin hodi tau iha fundu veteranu no ida ne'e seidauk uza.
“Depois atu uza tan billaun ida e buat sira ne'e hotu ha’u hanoin katak presiza diskusaun klean liután, para ita bele konvensidu se Governu iha razaun forte kona-ba sustentabilidade fundu ba veteranu sira”, afirma nia.
Aleinde halo sede ba arte marsiál sira, ida ne'e La'o Hamutuk hanoin katak, ne'e la'ós urjente maske Governu iha razaun tanba ne'e presiza tempu atu diskute.
"Nomós apoiu $200 dolar ba uma ka'in sira, karik Governu iha razaun ita presiza fó tempu atu diskute, e liliu la'o hamutuk ninia prespetiva katak ita tenke iha forma propriadu ida, atu ita bele distinje se mak merese liu”, dehan nia.
Husi $200 ne'ebé Governu atu atribui ne'e presiza haree la'ós ba uma ka'in hothotu maibé haree ba se mak volnuravel liu atu iha kbi’it oituan para enfrenta krize iha rai laran.
“Buat sira ne'e hotu mak ami hanoin katak, proposta retifikativu laiha razaun ne'ebé justifika atubele pasa iha PN, ami husu deputadu sira atu haree klean”, esplika nia.
Maibé ko'alia kona-ba Lei fundu petroliferu liliu Rendimentu Sustentavel Estimadu (RSE) parte LH mós haree katak sei laiha kontráriu bainhira governu justifika razaun, tanba la relavante ona atu ko’alia asuntu RSE.
“Foin lalais ha’u halo pergunta ida ba Ministériu Finansas no ministru sira iha jornada da planeamentu, ha'u dehan hanesn ne'e, bele ka la’e Timor-Leste fila ba RSE ho plafon millaun $500,000.000, e sira dehan labele, tanba ita-nia plafond nível despeza kada tinan ne'ebé fiksu ona ne'e, Billaun $1.2 ne'e aprova tiha ona ho lei”, afirma nia.
Tanba ne'e iha lei fundu petroliferu mós hatete levantamentu fundu petroliferu eksede ka liu rendimentu sustentavel no estimadu (RSE) ida ne'e Governu bele fó justifikasaun katak investimentu ida ne'e investe ba interese tempu naruk. (*)
