Ho akordu ne’ebé hala’o iha Sala Gabinete Diretór Jerál, sesta (11/03), atu fasilita formasaun lala'ok kooperativas ba grupu ne'ebé durante ne'e Plan Internasionál estabelese ona iha Munisípiu Aileu hamutuk grupu 6, no Munisípiu Ainaro hamutuk 4, tanba prontu ona atu nakfilak-an sai Kooperativa Kréditu.

Diretór Jerál Kooperativa SEKOOP, Francisco Xavier, aprésia ho prezensa Plan Internasionál Timor-Leste ninia ne'ebé ho vontade di’ak hodi apóiu komunidade sira ne'ebé iha área rurál.

“Kooperasaun ida ne'e importante tebes, hodi atende ba situasaun ita-nia komunidade sira-nian. Ita hotu hatene Governu mesak sei labele kobre hotu ba komunidade sira-nia preokupasaun, maibé prezensa parseiru sira, liu Plan Internasionál Timor-Leste nian, oinsá mak bele responde mós parte balun”, dehan Diretór Francisco Xavier iha Akait, sesta (11/03).

Tanba ne’e kompremetidu sei asegura akordu ne'e hodi nune'e bele benefisia ba parte hothotu. Antes ne'e mós asina akordu ho parseiru sira hanesan, Corpu da Paz, World Vision, ADRA, UNDP, no selu-seluk tan hodi fasilita formasaun.

Country Director Plan Internasional Timor-Leste, Dillyana Ximenes, sente kontente servisu hamutuk ho SEKOOP hodi nune'e bele haforsa liután grupu hirak ne'ebé estabele ona iha tinan barak nia laran.

“Ha’u mós husu ba parte rua atu labele viola fali akordu ne'ebé mak hothotu konkorda ona, maibé hothotu tenke kumpri regra sira ne'e, hodi nune'e ba futuru labele akontese buat hirak ne'e ita hotu la espera”, dehan nia.

Partisipa iha seremónia akordu ne’e, Diretór Nasionál Dezenvolvimentu Kooperativa Finanseira, Reinaldo Borges, Diretór Nasionál Dezenvolvimento Kooperativas Prudusaun, Leonito Mendonça, Xefe Departamentu Rekursu Umanu, Marcelino Menezes, nomós ekipa husi Plan Internasionál Timor-Leste nian. (*)