Lansamentu ne'e hala'o husi Sekretaria Estadu Komunikasaun Sosial (SEKOMS), Mericio dos Reis “Akara” United Nations Children's Fund (UNICEF) no UNTL rasik, hodi halo dezlokamentu ba estudante sira ba rádiu komunidade 6 hodi promove programa "Rejistu Moris" ba komunidade iha nível lokál, no tuir planu ohin estudante sira desloka ba munisípiu.
Mericio Juvinal dos Reis "Akara" konsidera programa ne'e importante no governu fasilita meiu komunikasaun sosial ba estudante sira hodi aplika koñesimentu liuhosi Rejístu Moris.
"Importane ba estadu no governu tanba ba oin ita hatene tuir ita nia sidadaun sira nia númeru, estatístika, data base", Akara hateten lia hirak ne’e hafoin halo lansamnetu ba programa estájiu iha Kampus UNTL Kaioli, (05/11).
Nia dehan, estudante sira presiza aproveita oportunidade ne’e, tanba tempu ona atu sira mós prátika, la'ós teória de'it, tanba prátika importante atu sira ba halo promosaun rejístu moris.
"Estudante sira bele aproveita momentu ida ne'e, atu atualiza matenek mak sira aprende husi universidade, no iha tempu hanesan sira bele ajuda ita nia estadu", nia tenik.
Akara lori governu nia naran, hakarak apresia mós ba parseiru sira hanesan UNICEF, no Embaixada Japaun, mak apoia no tulun ona estudante sira bele halo sira nia prátika estájiu ne'e diak liu tan.
Dosente UNTL, Júlio Aparicio, lori naran universidade agradese ba SEKOMS, UNICEF, no MJ, tanba fo ona biban ba estudante sira hodi bele hala'o estajiu ba estasaun rádiu 6 iha munisípiu, Baukau, Manufahi, Manatuto, Kovalima, Vikeke no Ermera.
Entretantu, estudante sira kompostu husi feto 4 no mane rua mak, Celina Alves Lopes, Leonia de Araújo, Emerenciana de Jesus, Honório Guterres, Elias da Costa, no Francisco Colo.