“Ohin (04/07) SEAK ho komisaun organizadora mai marka audénsia ho PM hodi atualiza ami-nia preparativu, ba atu halo lansamentu fatuk dahuluk ba edifísiu biblioteka nasionál, no husu mós PM nia disponibilidade atu partisipa iha atividade lansamentu ne'e, hanesan xefe do Governo atu halo diskursu ba Timoroan hotu sobre ba funsionamentu husi ita-nia biblioteka nasionál ne'e iha 19, inklui hatur fatuk dahuluk”, dehan Teófilo, hafoin hasoru malu ho PM iha Palásiu Governu, segunda (04/07)
Nune'e orsamentu ba edifísiu foun ne'e mai husi doadór sira ne'ebé fó husi kompaña INAI ho montante millaun $10.
“Biblioteka nasionál ne'e ita-boot sira hatene katak, orsamentu ne'e mai husi doadór, mai husi kompaña INAI iha kedas 2009 ate agora ita seidauk implementa, ita-nia problema mak rai laiha, entaun iha VIII governo konstitusionál ne'ebé mak lidera hosi PM fó orientasaun ba MSSK no SEAK aselera prosesu ida-ne'e hamutuk ho autóridade nasionál Petroleu Minerál nomós kompaña INAI entaun ita-nia prosesu tenderizasaun atinje ona 98% iha faze ida-ne'e, no orsamentu ba konstrusaun ne'e hamutuk 10 Milhões”, informa nia.
Enkuantu edifísiu foun ba Biblioteka Nasionál ne'e sei hari’i iha edifísiu ADN nia kotuk, Hudi Laran ho rai nia luan 27 mil kuadradu.
Nune'e Primeiru Ministru rasik apresia ho preparativu hirak ne'e husi komisaun organizadora nomós servisu husi autoridade nasionál Petroleu Mnierál no kooperasaun husi kompaña INAI tanba sira mak doadór.
“Por tantu responde husi PM rasik mak, dahuluk nia apresia ho Komisaun Organizadora ho sira seluk nia preparasaun no daruak mak Primeiru Ministru disponivel atu partisipa iha lansamentu ne'e, ne'ebé fatuk refere sei hatur dahuluk husi PM”, hatete nia.
Entretantu Biblioteka nasionál ne'e sei konserva livru hirak ne'ebé mak oras ne'e hamutuk rihunualu-resin, ka besik rihun-9 mak tau hela iha edifisiu SEAK.
Tanba laiha espasu entaun ho esperansa ba edifísiu foun ne'e kompaña vensedór sira sei aselera prosesu konstrusaun ne'e durante fulan 18 nia karan nune'e bele tau livrus sira-ne'e.
“Ita mós sei halo dijitalizasaun ba ekipamentus biblioteka nia, primeiru fasilita ba públiku, segundu estudante sira ne'ebé mak atu asesu ba livru ou buka referénsia ruma bele asesu de’it iha biblioteka nasionál”, haktenik nia. (*)