Tuir previzaun tempu ne’ebé fó sai husi pájina TLMC bazei ba pergunta sira ne’ebé tama kona-ba udan bainhira mak para, “husi biban ida ne'e ami hakarak informa ba komunidade sira katak tuir modelo meteorológico sira ne'ebé mak iha, udan ne'ebé ohin akontese no oras ne'e dadaun kontinua udan, iha tendensia atu kontinua to'o aban Segunda-feira (05/04/2021)”, informasaun iha pájina TLMC, domingu (04/04).
Ho ida ne'e, TLMC husu ba komunidade sira ne'ebé mak hela iha área sira risku ba inundasaun atubele kontakta autoridade sira hanesan protesaun sivíl, bombeiru, autoridade lokál, polísia no autoridade kompententes sira hodi bele evakua karik presiza.
Eventual ida ne'e rasik akontese tanba influénsia husi estabelesimentu sistema baixa presaun ne'ebé mak oras ne'e desloka ho sentidu sudoeste no iha tendénsia atu afasta husi Illa Timor iha loron segunda.
Antes ne’e TLMC mós alerta ba komunidade bazeia ba imajen satélite Himawari-8 nota katak oras ne dadaun Illa Timor tama iha estadu alerta máxima ba posibilidade inundasaun no rajadas anin ne'ebé liu 30 km/h iha área kapitál Dili, Oekussi, Likisá, Ainaro, Aileu, Suai, Bobonaro, Illa Atauro, Manatuto, Baukau no rmera.
Eventual ida ne'e akontese tanba hetan influénsia husi sistema meteorolójiku sira hanesan, Sistema Baixa Presaun (Low pressure); Osilasaun Madden & Jullian no Brisa Marritima.
Tanba ne’e, husu ba komunidade sira ne'ebé hela besik área sira ne'ebé risku ba inundasaun atu kontinua toma atensaun ba eventual sira ne'ebé ema hotu la espera.
Haree ba udan boot husi loron sábadu to’o domingu (03 to’o 04/ 04) konsege hamosu inundasaun maka’as iha Kapitál Dili halo komunidade barak mak lakon hela fatin tanba bee ne’ebé tama sira-nia uma laran no balun hetan sobu husi anin ne’ebé maka’as.
Tuir observasaun husi www.tempotimor.com iha terenu nota katak, bee mota ne’ebé sai husi Ponte Maloa konsege tama to’o área Palásiu Prezidensial inklui mós estrada iha área refere.
Husi Inundasaun Kapitál Dili Haree ba estrada diresaun Embaixada Japaun-Praia dos Coqueiros, terminal Bekora ne’ebé bee tama, tanba Mota lori aí-hun boot hodi hatan ponte rerefete.
Iha parte seluk korente bee ne’ebé boot konsege hakotu Ponte Perumnas. Nune’e mós iha parte Bidau bee sa’e kuaze metru ida. Akontesimnetu hanesan mós iha parte Rai Kotu, nomós área Laboratóriu Nasionál ninian.(*)
