SEKoop Elizário haklaken asuntu ne'e, relasiona ho protesta balu ne'ebé hato'o husi komunidade sira iha Postu Admimistrativu Suai Villa, ne'ebé ezije katak durante inísiu lansamentu distribuisaun ai-haan cesta bázika iha fulan Outubru tinan 2020 liubá, to'o oras ne'e komunidade sira seidauk simu sira nia direitu.

"Suku sira-ne'ebé lokaliza iha parte villa ka sidade ne'e responsabilidadr MTKI nian, tanba kuandu iha inísiu ami halo diskusaun, suku sira-ne'ebé iha munisípiu sira, ne'ebé mak besik liu loja sira, ka iha loja barak ne'e, MTKI maka responsábiliza," hatete, SEKoop Elizário Ferreira klarifika ba jornalísta sira iha nia kna'ar-fatin Akait, kuarta (27/01).

Nia hatutan, suku hirak iha villa ne'ebé to'o oras ne'e seidauk asesu ai-han sexta bázika ne'e ba MTKI maibé parte SEKoop nian termina ona.

Nia dehan, munisípiu sira ne'ebé konklui ona 100% ne'e mak Kovalima de'it, maibé iha semana ida-ne'e sei konklui tán munisípiu Ainaro, Aileu no Likisá.

"Tanba iha Likisá sei falta suku rua, maibé loron hirak ne'e sé konklui, Likisá bele hotu ona, iha Ainaro hela suku tolu, Aileu mós sei hela suku rua, no lakleur tan hotu ona, maibé sei hela Manatuto, Lospalos no hela Same", nia hakotu.

Entretantu, munsípiu hitu ne'ebé SEKoop responsabiliza mak Covalima, Ainaro, Aileu, Manufahi, Likisá, Manatutu no Lospalos. (*)