Lansa Fatuk Dahuluk Estrada Baucau-Viqueque Featured

Lansa Fatuk Dahuluk Estrada Baucau-Viqueque Foto Midia MOP
Tempotimor (Baucau) – Ministru Obras Públika (MOP) hamutuk ho Banku Dezenvolvimentu Aziátiku (ADB) lansa fatuk dahuluk, ba reabilitasaun estrada diresaun Baucau-Viqueque.  Orsamentu ba projetu estrada refere, nu'udar fundu emprestimu husi ADB ho montante miliaun $ 44.
 
“Governu simu fundu emprestimu husi ADB, ho objetivu atu reabilita no manutensaun ba estrada nasionál ne’ebé liga Munisípiu Baucau no Munisípiu Viqueque,” dehan MOP, Salvadór Eugénio Soares dos Reis Pires bainhira lansamentu fatuk dahuluk iha Venilale, Sesta (09/08/2019).
 
Salvador dehan, iha prosesu reabilitasaun estrada nasionál ne'e, sei iha sesaun rua ne'ebé sei loke kampu servisu ba komunidade sira. Sesaun primeira diresaun Baucau-Venilale no sesaun daruak mak diresaun Venilale-Viqueque.
 
“Prosesu reabilitasuan estrada nasionál sesaun rua ne’e, sei kria mós kampu servisu ba komunidade sira maiz um menus 26.487 pesoas ne’ebé hela iha area ne’e, nomós postu administrativu no suku sira ne’ebé besik sei hetan benefísiu direta no indireta husi reabilitasaun estrada ne’e,” tenik Salvadór
 
Ministru akresenta, estrada diresaun Baucau-Viqueque sei aselera atividade ekonomia, liuliu hamenus tempu viajen, loke asesu ba merkadu, eskola no sentru saúde sira. Inklui projeitu ne’e sei halo estrada seguru no reziliente liután ba afeita mudansa klimátika.
 
Entretantu, diretór Banku Dezenvolvimentu Aziátiku (ADB) Paolo Spantigati dehan, kleur ona mak ADB sai parseiru di’ak ho TL.
 
“ADB kleur ona sai parseiru ba Timor Leste liu-liu iha dezenvolvimentu area infraestrutura. Hametin konetividade estrada rekoñesidu nu’udar fatór xave hodi kria kampu servisu, aumenta produtividade agríkola no hamenus ki’ak,” dehan Spantigati
 
Diretór ne’e realsa, projeitu ne’e mós prepera dadaun planu no etratéjia komprensivu ba manutensaun estrada liuhosi koordenasaun hamutuk ho governu no parseiru dezenvolvimentu sira seluk. Nune’e projeitu reabilitasaun estrada Baucau-Viqueque sei remata iha tinan 2022.
 
Nia afirma, ADB mós kompremetidu ona atu atinji Ázia no Pasífiku ida ne’ebé prospéru, inkluzivu, reziliente no sustentavél ho esforsu atu kontinua halakon ki’ak.
Rate this item
(3 votes)
Last modified on Saturday, 10 August 2019 07:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com