Prezidente Kooperativa Kréditu Union Negosiasaun Emprésta Ekonómia Komunidade (NEHEK), Sabino Ramos hateten, sei iha mehi atu forma tan grupu iha postu administrativu Hatubuiliku ho Maubisse tanba seidauk kobre iha ne'ebá liu-liu iha área produsaun nian.
“Prímeiru, rai no foti osan. Segundu, hakiak manu Broiler ne'ebé mak agora dadaun iha ho manu lokál, tuir fali maka ami hakiak mós ikan”, Prezidente Kooperativa NEHEK, Sabino Ramos hateten ba jornalista iha sede Suku Maununo, tersa (27/10).
Nia esplika, razaun sira hakarak kria tan atividade sira ne'e, tanba bainhira osan ne'ebé ema emprésta tama fila-fali ona ba iha kooperativa, membru sira sei foti hodi emprésta fila-fali hodi nune'e bele kria tan atividade seluk.
“Osan ne'ebé mak ami iha, osan ne'ebé mak sirkula iha liur tama mai, osan ne'e bainhira la hetan emprésta ona, entaun ami nia membru ne'e sei halo kréditu fila-fali, atu nune'e bele halo atividade hanesan hakiak manu Broiler”, dehan esplika tan.
Tuir planu, Kooperativa NEHEK sei halo tan iha futuru maka, halo karau luhan atu hakiak karau, fahi no bibi, seluk maka liga mós ba iha parte ortikultura, kuda modo, liis, señora ho selu-seluk tan, inklui agrikultura, hanesan forekelin, foremungu no forerai.
“Preprasaun ne'ebé ami atu halo ne'e, ami iha viveiru ba Vanili, ai-nanás, rambutan, salak, husi tanjerina, hudi, bua-naga no selu-seluk tan. Ida ne'e mak ami planeia ba oin atu halo”, nia esplika.