Tempotimor (Dili) – Prezidente Repúblika, Francisco Guterres Lú-Olo, Segunda (29/07/19) bolu Primeiru Ministru Taur Matan Ruak, hodi ko’alia kona-ba prosesu manda leis nomós dekretu leis hirak ne'ebé presiza hetan promulga husi Prezidente Repúblika.

“Prezidente da Repúblika mak bolu ha'u mai, liu-liu ko’alia ituan kona-ba leis no dekretu leis hirak ne'ebé haruka mai. Espesialmente, hirak ne'ebé iha relasaun ho asinatura tratadu dia 30 nian ne'e. So pontu ida ne'e de'it mak ohin prezidente konvoka ha'u para atu fó hatene,” PM Taur informa ba jornalista iha Palásiu Prezidensial, Bairru-Pite.

PM Taur hatete, “Prezidente Repúblika husu katak prosesu ne’e tama dala ida de’it. Tanba normalmente, lei mak tenki mai uluk. La'ós dekretu lei mai uluk. “So que, ami haruka dekretu leis mai uluk, antes parlamentu aprova iha Parlamentu, haruka mai sr. Prezidente, ami (nia) dekretu lei tama uluk. Entaun entermus prosesuais ami halo ajustu ida, para halonusa maka hadi’a ida ne’e,” PM dehan. 

PM Taur mós rekoñese katak ein termu prosesu ne'e la justu. Tan ne'e, nia promete para oinsá mak hadi'a no oinsá prosesu atu ajusta. 

Tuir fontes tempotimor.com ne’ebe besik liu ba Governu informa katak antes Parlamentu aprova projetu alterasaun ba leis hat, VIII governu haruka ona dekretu lei hat mak iha Konsellu dos Ministrus ba Prezidente da Republika. Tuir fontes hanesan mos informa katak iha semana kotuk, wainhira Prezidente Republika Francisco guterres Lu Olo simu leis sira ne’ebe aprova ona iha Parlamentu Nasional, iha momentu hanesan Xefe do estadu haruka fali hotu governu ninia dekretu lei sira ne’e ba Parlamentu Nasional.