Portavós Perisionariu, Normio Falocão, hatete razaun hasoru malu ho deputadu sira iha Komisaun A hodi koalia kona-ba prosesu eleisaun ba reprezentante jornalista ba Conselho de Imprensa ne'ebé hala'o iha tinan kotuk.

Nia haktuir atividade konferénsia hodi hili membru CI momentu ne'e organiza hosi CI rasik no Assosiasaun Jornalista Timor Leste (AJTL) ilegalidade.

“Ami mai ko’alia kona-ba prosesu ne'ebe ami lori halo petisaun ida mai iha parlamentu hodi kestiona kona-ba prosesu eleisaun ba reprezentante jornalista nian ne'ebe organiza hosi KI ho AJTL iha tinan kotuk liubá ne'e. Ami kestioma ninia legalidade, tanba regra hotu-hotu CI rasik mak prodúz maibé sira viola fali regra ida-ne'e tanba ne'e mak ami mai kestiona lori prosesu ida-ne'e mai iha Parlamentu Nasional," Portavós ne’e informa ba jornalista sira hafoin hasoru malu ho Komisaun A, tersa (06/01).

Durante deskusaun, nia aprezenta katak sira hato'o petisaun ida-ne'e tanba hetan asinatura husi jornalista na’in-32, hodi kestiona leglidade eleisaun ne’e.

Noemio afirma, petisionáriu sira hato’o ezijénsia ne’e kestiona prosesu eleisaun ne'ebe maka hala’o ba iha reprezentante jornalista na’in idane'ebé hili CI.

“Tanba prosesu votasaun iha momentu ne'ebá ne'e la’ós jornalista profísional, la’ós jornalista sira- ne'ebé hetan karteira profísional hanesan lei komunikasaun hatete iha lei Komunikasaun Sosiál artigu 17 hatete katak ema ne'ebe iha direitu ba vota ne'e ema ne'ebe jornalista no hetan karteira profesional hosi CI rasik,”nia tenik.

Portavós ne’e lori petisionáriu sira-nia naran prontu hein de’it desizaun saida mak parlamentu foti, no sei iha dalan atu lori prosesu ida ne'e ba to'o iha tribunál tanba konforme hosi komisaun A rasik fó sira nia opiniaun katak prosesu ida ne'e kuandu halo desizaun ba anulasaun karik ne'e ninia na’in mak iha tribunál.

“Ami reforsa nafatin opiniaun ne'ebé fo sai tiha ona iha petisaun ne'e katak prosesu ne'ebé latuir lei tenke tau atensaun tanba parlamentu liuliu Prezidente Parlamentu Nasionál rasik mak sei fó tomada de pose ba reprezentante CI na’in-lima, tanba ne'e ami hanoin prezidente tenke tetu lai maibé petisaun tama iha PPN no PPN baixa mai iha Komisaun no komisaun sei halo rekomendasaun ba iha plenária mak plenaria sei tetu no fó apresiasaun ba petisaun ne'e rasik,” nia dehan.

Iha fatin hanesan, Prezidente Komisaun A, Deputadu Joaquim dos Santos, hatete ohin komisaun bolu petisionariu hosi jornalista sira mai atu klarifika sira-nia problema ne'ebe komisaun A rejista ona sira aspirasaun hotu.

"Ohin ami bolu petisionáriu sira ho jornalista sira, komisaun hakarak atu rona sira-nia konstesta ba rezultadu eleisaun kona ba hili reprezentante jornalista ba tuur iha CI, ne'ebé eleisaun ne'e hala’o iha tinan kotuk, maibe molok ami rona sira, komisaun haruka uluk karta ba iha Prezidente CI Virgílio Guteres husu ninia deklarasaun kona-ba prosesu halo eleisaun ba reprezenta jornalista," Prezidente Komisaun A esplika.

Joaquim esplika, durante audiénsia komisaun rejista ona sira-nia problema ne'e, aspirasaun hotu liga prosesu konferénsia AJTL nian, liga ba serbisu CI nian, liga ba kontestu jornalista sira-nia pozisaun, liga ba étika jornalizmu no oinsá mak atu ajuda rezolve problema ne'e.

Komisaun A sei aprezente relatóriu ba meza prezidénsia Parlamentu Nasionál atu konsidera aspirasaun sira-ne’e hotu nune’e hadi’a situasaun jornalizmu iha Timor-Leste bazeia ba Lei Komunikasaun Sosiál.

“Sira-nia petisaun ne'e ajuda ita atu hadi’a bele deskobre buat balu laloos atu-bele hadi’a no buat sira-ne'ebé di’ak ona ne'e ita kontinua asegura para kna’ar jornalístiku ne'e bele sai di’ak liután iha ita- nia rain doben Timor-Leste ne'e,” nia hakotu. (*)