Diretór Jerál (DJ) Konsulár Protokolár no Média, Ministériu Negósiu Estranjeiru no Kooperasaun (MNEK) Juvencio de Jesus Martins, hateten, esforsu hotu ne'ebé governu no ajénsia sira halo hodi dezloka hikas timoroan sira ba serbisu fatin konklui ona.

"Ami husi MNEK, Interiór, MTK no ajénsia sira-nia esforsu hotu, ohin to'o ona rohan no ororas tan ita boot sita atu aranka ona ita-boot sira-nia serbisu fatin iha UK," Juvencio hateten iha salaun VIP Aeroportu Comoro molok Timoroan sira ne'e dezloka ba Reinu Unidu, Kuarta (28/10).

Nia mós dehan, timoroan sira ne'ebé iha estranjéiru nu'udar eroi ba ekonomia Timor-Leste nian.

"Ita-boot sira mak eroi ba ekonomia TL, ita-boot sira kontribui barak ba ita-nia familia, komunidade, sosiedade nomós ba ita-nia nasaun," nia tenik.

DJ ne'e mós husu ba timoroan sira ne'e atu labele haree ba obstakulu ne'ebé mosu, tanba obstakulu sei barak, maibé haree de'it ba rezultadu ne'ebé sei halo.

"Ami husu ba ita-boot sira, atu serbisu iha ne'ebá sai embaixadór TL nian iha UK, Portugal no Irlandia, atu nune'e lori kultura Timor nian hodi morin iha rai sira ne'ebá," nia hameno.
Nia mós fó korajem nafatin ba timoroan sira atu kuidadu aan iha ne'ebá, tanba mundu sei iha hela Corona Virus.

Alende ne'e reprezentante ajénsia Cammer PC Nico Jerónimo hateten, billete ba timoroan sira husi Malazia ba Europa, ajénsia no timoroa sira joint, tanba ne'e hodi valida billeta sira ne'e to'o ohin konsege halo viajem.

"Ita boot sira-nia osan dollar $100 iha ajénsia ne'e ajénsia ho imi ita joint, nune'e ajénsia aumenta pursentu 50% hodi re-ativa ita-boot sira-nia billet to'o ikus ita-boot sira bele aranka ba iha ne'ebá, la'ós ajénsia mak subar, maibé ajénsia nia hakarak mak imi beke fila ba Reinu Unidu," nia esplika.

Iha fatin hanesan pasajeiru Aires Nunes Ximenes sente kontente tanba governu bele aprova ona sira-nia viajem ba UK.

"Loloos ne'e ami aranka ona iha dia 24 semana kotuk, maibé tanba iha fallansu entaun lakonsege ba, maibé ohin ami konsege ba. Ami sente kontente tebes, tanba ami bele ba serbisu hodi ajuda ami-nia familia no ajuda mós ita-nia estadu," dehan timoroan ne'e.

Alende ne'e timoroan Eufrasia Viera nu'udar pasajeiru sente kontente, tanba ohin bele viajem ona ba Reinu Unidu.

"Semana kotuk ne'e halo ami triste, la'ós ba ha'u, maibé ba ha'u maluk sira, tanba sira atu ba fali serbisu, maibé ohin ami bele viajem ona, entaun ha'u sente kontente loos," Eufrasia espresa.

Entretantu timoroan sira ne'e sei viajem ba UK ho aviaun Citilink ne'ebé timoroan sira hamutuk ho ajénsia Cammer PC aluga.