Deklarasaun Ministru Miguel relasiona ho preokupasaun deputadu bankada Partidu Libertasaun Popular (PLP) kona-ba kandidatu ba Prezidente Autoridade balun husi Munisipiu Baukau ne’ebé liu teste maske ho nivel edukasaun quarta klase.
"Selesaun ne'e bazeia ba dekretu Lei númeru 3/2016, juri sira admite kandidatu sira atu ba tuir ezame ne'e bazeia ba dekretu Lei," dehan Ministru Miguel hafoin remata reuniaun Konsellu Ministru extraordinária iha palasiu governu, Segunda (12/0/10).
Tuir dekretu lei ne’e, nia esplika, kriteira atu kandidata an ba Autoridade Munisipál ka Administradór Munisípiu bele mai husi li’ur no bele mós mai husi funsionariu públiku sira.
“Kriteiru ida, sidadaun ne'e hanesan funsionariu públiku, se grau la'os tekniku superior, entaun tenke hala'o funsaun dirijente iha administrasaun públika. Kriteira ida seluk, nia tenke iha esperensia profisional iha administrasaun públiku minimu tinan lima, ne'e mós bele priense kriteira sira. Agora, se nia la'os funsionariu públiku, minimu tenke 45 idade, mais tambem tenke esperensia profisional pelumenus tinan 5 iha administrasaun no bele iha seitor privadu sira, no nia tenke iha saúde di’ak, koñesimentu kona-ba informatika sira," dehan nia.
Tan ne’e, nia afirma, MAE loke konkursu no halo teste bazeia ba dekretu lei ne’ebé iha ona.