Ohin reprejentante povu iha uma fukun Parlamentu nasional konklui ona debate orsamentu jeral estadu 2020 bainhira maioria deputadu vota ba final global 43 afavor, kontra 21 no abstensaun 1.
Nune'e liu husi deklarasaun votus, deputadu husi bankada guvernu Luis Roberto hatete partidu Khunto sempre firme fo votus afavor ba orsamentu jeral estadu hanesan parte komitmentu apoiu VIII guvernu konstitusional, mesmu iha prosesu ezekuta OJE fulan rua novembru too dezembru deit.
Maibe Luis Roberto mos hatutan durante iha debate OJE 2020, deklarasaun politika ne'ebé hato'o husi deputadu bankada CNRT sira hatudu momos katak partidu CNRT lakohi simu realidade bainhira sai opozisaun iha Parlamentu nasional.
"Hakarak hato'o ba povu doben Timor-Leste katak deklarasaun politika ne'ebé mak hasai husi bankada CNRT hatudu momos katak ne'e odiu vigansa ida katak lakohi simu realidade atu sai opozisaun iha nasaun ida ne'e," dehan Luis.
Luis mos husu bankada CNRT atu lé Konstitusaun RDTL artigu 112 ne'ebé hatete momos oinsa guvernu ida monu, nune'e tuir Luis, CNRT labele hatete VIII guvernu inkonstitusional tanba VIII guvernu nia legitimidade fo iha parlamentu nasional.
"Se bankada opozisaun sira la simu karik presija halo letura ba artigu 112 Konstitusun RDTL," dehan Luis.
Nune'e Luis Roberto enkoraza guvernu atu kontinua halao servisu tuir kapasidade ne'ebé iha.
Antes ne'e, liu husi deklarasaun votu Vise-prezidenti bankada CNRT Patriocino Fernandes dos Reis afirma pozisaun katak VIII guvernu de faktu no Parlamentu nasional V legislativa kaduka ona bazeia ba lei artigu 86 alina f K-RDTL, nune'e tuir lolos Prezidenti Repúblika desolve ona PN prazu loron 60.
Nune'e hafoin remata deklarasaun votu, 21 deputadu bankada CNRT dereitamente husik hela plenária mesmu Prezidenti Parlamentu nasional seidauk insera debate OJE 2020.
Entertantu orsamentu jeral estadu tinan 2020 remata debate iha Parlamentu nasional durante loron 6 bainhira maioria deputadu avafor 43, kontra 21 husi CNRT no abstensaun 1 iha final global.(*)