Projetu ne'e atu regula ba alienasaun, importasaun no produsaun saku, embalajen no objetu plástiku sira.

"Diploma ida ne'e ninia objetivu mak atu prevene no redús impaktu aat ne'ebé ba iha meiu-ambiente", dehan Ministru Reforma Lejizlativu Asuntu Parlamentár (MRLAP), Fidelis Manuel Leite Magalhães, iha Palásiu Governu, Kuarta (4/3).

Governante ne'e hatutan, iha dekretu lei ne'e prinsipalmente atu regula importasaun no venda plástiku sira.

Nune'e, impoin mós kona-ba bele fa'an plástiku, maibé ida ne'ebé bele halo resiklajen no bandu atu halo akizisaun, distribuisaun, importasaun no produsaun ba objetu plástiku ruma.

Ministru Fidelis hakotu, projetu ne'e prevé mós oinsa atu estabelese prinsipiu fundamental hanesan, prekauzasaun, prevensaun, dezenvolvimentu sustentavel, seguransa ambientál globál, poluidor-pagador, re-utilizasaun, resiklajen no valorizasaun enerjetika. (*)