Tuir kalendáriu Ministériu Administrasaun Estatal (MAE), eleisaun ba Xefe Suku sei realiza iha Fulan-Outubru nia laran.
Nune'e, joven potensia ne'e, komfirmadu ona hakarak kompete hodi kontribui ba dezenvolvimentu iha Suku Nahareka ba futuru.
Tuir kandidatu Xefe Suku, Gilberto Angelino Alves katak, prontu ona atu kompete iha eleisaun Suku.
"Ha'u prontu kandidatu-aan ba Xefe Suku, tanba hanesan joven hakarak kontribui ba dezenvolvimentu Suku Nahareka nian", dehan nia ba www.tempotimor.com, iha Nahareka, segunda, (4/9).
Nia dehan, kompete iha eleisaun manán ka lakon ne’e la’os kestaun, importante jerasaun foun nafatin iha vontade hodi kontribui ba Suku.
Maibé, bainhira povu fó konfiansa iha eleisaun mak nia parte prontu simu responsabilidade hodi lidera Suku Nahareka.
"Karik ha'u manán, la'os atu servísu mesak, maibé sei servísu hamutuk ho povu hodi haree ba problema bázika sira iha Suku laran", nia dehan.
Gilberto Angelino Alves ho idade 37 (kabe-nai'n), husi Aldeia Maurate no dadaun asume hela responsabilidade iha Suku Nahareka nu'udar Xefe Juventude.
Suku Nahareka iha Aldeia lima hanesan, Macabu'u, Rai-La'a, Maurate, Darenau no Samarogo, no uma-ka'in hamutuk 612, kompostu husi populasaun 1.278, ne'ebé dadaun lídera husi Xefe Suku, Paulino Alberty Ximenes. (*)