Tuir komunikadu imprensa ne'ebe fo sai husi gabinete PR katak, ekipa Delegasaun ho Xefe Estadu sei hahú desloka iha loron 6 no sei fila mai iha loron 11 fulan-dezembru tinan 2022.
Durante vizita estadu, Xefe Estadu, Ramos Horta sei hala’o enkontru ho nia omólogu Prezidente Repúblika Singapura, Halimah Yacob no Primeiru Ministru Singapura, Lee Hsien Loong.
Primeiru Ministru sei oferese almosu ofisiál ida ba Prezidente Repúblika ho delegasaun no tuir mai banquete/han kalan Estadu ida sei oferese husi Prezidente Repúblika Singapura ba ninia omólogo Prezidente Timor-Leste, José Ramos Horta.
Presidente Repúblika sei hala’o mos Palestra Públika ida iha Institutu Yusof Ishak, ne’ebé sei modera husi Ministru Relasoens Exteriores Singapura, Vivian Balakrishnan.
Prezidente Repúblika Timor-Leste mós sei partisipa iha Fórum Empresarial, ne’ebé organiza husi Governu Timor-Leste ho apoiu no partisipasaun husi setor privadu sira husi nasaun rua nian.
Alende ne’e, Prezidente Repúblika sei halo vizita la'o ain turístiku ida, hodi haleu Reservatóriu ba Reaproveitamentu bee.
Tanba, Singapura no Timor-Leste hakesi relasaun diplomátika hahu kedas iha fulan-maiu tinan 2002 no Embaixada Timor-Leste nian iha Singapura inagura kedas iha fulan-dezembru tinan 2010.
Singapura no Timor-Leste hametin parseria forte tebes ne’ebé hatur iha valor no objetivu komun sira no asina mós kooperasaun bileteral kona-ba akórdu servisu aréu no Singapura fo ona asistensia téknica ba Timor-Leste, liu husi formasaun ba funsionáriu públiku sira 700-resin.
Formasaun hirak ne’ebé ajuda hodi fo kontribuísaun ba dezenvolvimentu rekursus umanus iha Timor-Leste, tanba investidor sira husi Singapura barak mós investe iha Timor-Leste. (*)