Minístru Finansas (MF), Rui Augusto Gomes, hatete, governu haruka ona proposta ba Prezidente Repúblika, José Ramos Horta, iha loron 17 fulan-novembru, maibé Gabinete Prezidente Repúblika husu ba Governu atu halo ajustamentu ba buat balun.
"Ita boot sira hatene, dia 17 de novembru Governu haruka tiha ona proposta ba Prezidente Repúblika, proposta ida ne'e kada tinan, iha 2019 to'o 2021 hanesan, entretantu iha Gabinete Prezidente Repúblika husu atu halo ajustamentu balun, tanba ne'e mak loke fali iha Sexta-feira liu ba ko’alia kona-ba kontratadu termu sertu de'it, maibé restu ha'u hanoin parese permanese de'it", dehan nia iha palásiu Governu, segunda (05/12).
Nia afirma, proposta ne'ebé Governu aprezenta ne'e, hanesan ho tinan hirak liu ba kotuk.
"Se ita boot sira haree proposta ne'ebé ami haruka ba iha dia 17, proposta ne'e, kada tinan hanesan", nia salienta
Nia hatete, informasaun kona-ba ajustamentu ne’e, Gabinete Prezidente Repúblika mak hatene, tanba ida ne’e la’os Ministériu Finansas nia kompetensia.
"Ha'u hanoin kestaun ida ke ita boot sira ba diretamente husu Gabinete Prezidente Repúblika, tanba proposta orijinál ne'ebé ami haruka ba ne'e iha dia 17 fulan-novembru", nia dehan
Maibé, Prezidente Repúblika veta proposta ne'ebé Governu aprezenta iha loron 17 fulan-novembru tinan 2022, kona-ba salariu -3 ba funsionáriu públikas no ajente administrasaun sira. (*)
