Xefe departemantu rekursu umanu HoREX Baukau, Sebastião Amaral, hatete, totál funsionariu iha HoREX Baukau kompostu husi permanente no komtratadu, inklui kompañia parseiru hamutuk eleitóres 239, pasiente no família pasiente 154.
"Totál votantes ne'ebé mak atu vota iha ne'e (Óspital Baukau) mak 393," dehan sebastião iha kna'ar fatin, tersa (19/04).
Lista eleitóres ne'ebé Ospitál Baukau submete ba Sekretáriadu Tékniku Administrasaun Eleitórál (STAE) Munísipiu Baukau antes loron 10 (10 dias) husi Munísipiu Lautém, Vikeke, Baukau inklui Manatutu sorin.
Pasiente no família ne'ebé naran laiha lista sei la ezerse nia direitu iha eleisaun prezidénsial tinan-2022 loron 19 fulan-abril (ohin), tanba tuir lei orgaun eleitóral naran latama iha lista hodi submete ba STAE Munísipal antes loron 10 (10 dias).
"Inklui família pasiente ho pasiente, bele 100 liu la vota iha loron ida ne'e, sira ne'e husi Munísipiu 3 inklui Manatutu sorin," nia afirma
Diretór STAE Baukau, Lucio Freitas Salvador, konfirma, eleitóres internadus iha HoREX Baukau hamutuk 393.
"Foin lalais eleisaun primeiru volta ne'e, Diretór rasik mai to'o iha (STAE Munísipal) ne'e, Diretór ko'alia mai ha'u ne'e, ema nia direitu, maibé lei mak limita, lei ne'e prontu tiha ona atu ezekuta lei ne'e, ida ne'e mak ha'u esplika, entaun agora ne'e sira komprende ona problema laiha," nia hatete
Enkuantu ba família pasiente no pasiente ne'ebé naran laiha lista antes ne'e HoREX submete ba STAE Munísipiu, se latuir eleisaun, tanba lei Nu.10/2022 iha artigu 1 kona-ba ambitu aplikasaun hatete ona, antes loron 10 aprezenta lista iha STAE Munísipiu, ida ne'e mak tuir eleisaun.
Periodu eleisaun prezidénsial segundu volta iha HoREX Baukau, hetan observasaun husi observadór internasionál Uniaun Europeia na'in-2, inklui membru PNTL Baukau hodi fó segúransa ba prosesu ne'e. (*)