Na’in-8 deside fila hikas ba halo tratamentu, tanba ekipa mediku sira buka tuir hodi konvense beibeik.

"Kazu droupout ka sees husi tratamentu ne’e hamutuk na’in-11, maibé ita nia mediku no konsilleru sira kada trimestral, sira ba munisípiu hodi buka tuir no ikus mai konsege konvense na’in-8 deside fila ba tuir tratamentu rutina no ita nia ekipa sei nafatin buka tuir hela sira seluk ne’ebe hasees an husi tratamentu", dehan Diretór Ezekutivu Klinika Bairo Pite, Inácio dos Santos, iha knaar fatin, segunda (4/12).

Sentru tratamentu antiretroviral klinika Bairo Pite rejistu ema moris ho HIV/SIDA hamutuk na’in-242,  iklui labarik nain-5, feto 2 no mane 3, restu idade adultu.

"Labarik sira ne'e hetan transmisaun HIV/SIDA husi sira nia inan aman ne'ebe pozitivu, partikularmente inan sira durante isin rua". Dehan nia

Nune'e husu ba ema moris ho HIV/SIDA atu hakbesik an nafatin ba halo tratamentu rutina, tanba medikamentu HIV/SIDA sufisiente inklui aimoruk 100%, tanba finansia husi Fundo Global.

Alende ne’e, Prezidente Institutu Nasionál Kombate HIV/SIDA, Daniel Marçal mós hatete, ema moris ho HIV halai sees husi tratamentu, tanba sira tauk hetan stigma no diskriminasaun husi família no sosiedade.

"Atu kombate stigma no diskriminasaun mak presiza kontribuisaun husi entidade hotu-hotu, liu-liu orgaun komunikasaun sira atu disemina informasaun kona-ba transmisaun HIV/SIDA ba komunidade. Ida ne’e importante tebes". Nia husu.

Nafatin enkoraja ema moris ho HIV sira atu kuidadu sira-nia saúde, liu-liu hakbesik aan ba fasilidade saúde hetan tratamentu, tanba governu prepara hela aimoruk atu proteje ema nia imunidade sai forte hasoru virus ne’e.

Entretantu tuir dadus komulativu husi Ministériu Saúde, hahú husi tinan 2003 to’o fulan-marsu 2023, totál kazu hamutuk 2.020, kompostu husi grupu idade menus tinan lima na’in 75, idade tinan 6 até 14 iha na’in 18, idade 15 até 24 iha na’in 566, idade 25 até 44 iha na’in 1.170, idade 45 ba leten iha na’in 191no husi númeru ne’e hatudu ema moris ho HIV, maioria idade produtivu 25 até 44 no idade joven 15 até 24. (*)